VOV4.K’ho- Mho ngai 03/6/2021, tàm Hìu duh broă Chủ tịch, ồng Nguyễn Xuân Phúc- Chủ tịch lơgar neh wă rò Đại sứ lơgar Nhờk tàm Việt Nam ồng Yamada Takio tus còp să mờ cribơyai jơnau đơs bè bơta git gơ̆p Lơh broă bal jŏ jòng jrô ơnàng đah Việt Nam mờ Nhờk.

Ồng Nguyễn Xuân Phúc- Chủ tịch lơgar tơlik nùs nhơm chờ hờp bơta gĭt gơ̆p Lơh broă bal jŏ jòng jrô ơnàng đah Việt Nam mờ Nhờk tàm tơngai lài pơn jăt tai bơtàu tơnguh niam bơnĕ tàm jơh ală gah broă lơh; sồr Đại sứ lơgar Nhờk dê pơn jăt tai tơnguh broă tìp măt kuang bàng kấp dờng màng mờ ală kấp đah 2 lơgar; lơh broă bal, dong kờl bal mờ gơ̆p tàm broă lơh rơcăng sơndră kòp Covid-19; sơlơ lơh bal lơh sa, hòi jà, sồr mpồl lơh sa kă bro lơgar Nhờk jơh nùs rề ơnàng bơcri priă, kă bro tàm Việt Nam.

Jơh nùs ưn ngài ngan ồng Nguyễn Xuân Phúc neh lời tŭ jiơ wă rò, ồng Yamada Takio tơlik nùs nhơm kơ̆p kờñ Chủ tịch lơgar Việt Nam còp kấp dà lơgar tus lơgar Nhờk tàm tơngai lơh broă tàm Việt Nam. Đại sứ đơs nền gùng dà broă lơh ờ tŭ lơi tam gơl bơh Chính phủ Nhờk dê sền dờng màng bơta gĭt gơ̆p mờ Việt Nam; pơn jăt tai jơh nùs dong kờl Việt Nam rơcăng sơndră kòp Covid-19; tơnguh lơh broă bal bơtàu tơnguh phan bơna, tam gơl sồ, tiah ơm kis; sồr mpồl lơh sa kă bro lơgar Nhờk bơcri priă tàm Việt Nam...

Cau mblàng Lơ Mu K’Yến