VOV4.K’ho- Drim ngai 19/10, tàm Hìu Quốc hội, Chủ tịch Quốc hội ồng Vương Đình Huệ đơng lam dơ̆ pơrjum Mpồl đơng lam Rơndăp broă lơh jŏ jòng bơ̆t bơtàu mờ lơh sir gơs Dà lơgar gơnoar kơrnoat boh lam Xã hội chủ nghiã Việt Nam tus nam 2030 mờ wèt tus nam 2045. Tàm dơ̆ pơrjum do, Mpồl đơng lam sền swì ring bal rơndăp cih jơnau yal tơngume sồ 10 lơh sir gơs kơrnoat tàm jàu broă, pơgồp bal, gròi sền đah ală anih lơh broă dà lơgar tàm broă lơh jăt gơnoar sền gàr adat boh lam đah ală anih lơh broă, mpồl lơh broă tàm broă lơh sền gàr adat boh lam lơh geh jơnau kờñ bơ̆t bơtàu, lơh sir gơs Dà lơgar gơnoar kơrnoat boh lam Xã hội chủ nghiã Việt Nam.

Đơs pơndŭt tàm dơ̆ pơrjum, Chủ tịch Quốc hội ồng Vương Đình Huệ sồr, 4 jơnau yal tơngume geh cribơyai ndrờm geh bàr pe bơta pal jăt bal, hơ̆ là dà lơgar gơnoar kơrnoat boh lam là bơta kuơ bal bơh kòn bơnus gùt dunia dê. Broă lơh Dà lơgar gơnoar kơrnoat boh lam Xã hội chủ nghiã Việt Nam gơcèng bơta tơrgùm jơh bal bơh kòn bơnus gùt dunia dê mơkung geh bơta krơi is, wèt tus xã hội chủ nghiã. Mpồl kuang bàng Dà lơgar kung geh bơta krơi is ndai bè bơta pal jăt tơrgùm bal làng bol lơh tờm, bơta pal jăt gơnoar ătbồ Dà lơgar, ring bal bơta tàm jàu broă, pơgồp bal gròi sền đah anih lơh broă lơh jăt gơnoar. Den tàng bè hơ̆, ală tơngume kờñ pal bơsram, lơh jăt, lơh bè lơi tơngŏ loh ală bơta do.

Cau mblàng Lơ Mu K’Yến