VOV4.K’ho- Drim ngai 18/5, tàm Hìu lơh broă Quốc hội, Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơng lam Pơrjum pờ tơlik tơn tàm internet gùt lơgar sền wơl broă lơh tĕ khà Kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Đơs tàm pơrjum, Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar pà git, tus tŭ do, bàr pe broă lơh rơcang tus dơ̆ tĕ khà neh lơh gơs, rơcang ai dơ̆ tĕ khà tàm ngai 23/5 do in.

Mpồl duh broă tĕ khà dà lơgar neh lơh nền bơyai lơh pơrjum pờ tơlik tơn tàm internet gùt lơgar dơ̆ do nàng kờñ kờp sền jơh broă rơcang lơh tus tŭ do, di tŭ iat mờ bơsong ală kòl yan, kal ke, ală jơnau dan, jơnau đơs bơh ală tiah, ală mpồl lơh broă geh gơ rềng dê nàng kờñ ring bal jơnau git wă, bơta lơh ngan uă tàm broă lam lơh nàng rơcang jơh nùs ngan rlau jơh, tơl làm ngan rlau jơh ai dơ̆ tĕ khà in- dùl broă chính trị dờng màng bơh dà lơgar dê geh lơh jat di broă rơndap lơh, ngan ngồn là Ngai chờ dà lơgar, Ngai chờ bơh jơh gùt làng bol dê mờ ngan ngồn lơh geh cồng nha niam bơnĕ.

Cau mblàng K’Duẩn