VOV4.K’ho- Drim ngai 16/11, Chủ tịch Quốc hội ồng Vương Đình Huệ neh tus bal Ngai chờ tam klăc dờng jơh gùt jơi bơtiàn tàm xã Trung Lương, kơnhoàl Định Hoá, càr Thái Nguyên. Chủ tịch Quốc hội ồng Vương Đình Huệ gờm chờ xã Trung Lương neh kờp sền mờ lơh geh jơh 19 broă jàu bơ̆t bơtàu xã ƀòn lơgar pa mờ gam lơh sră dan dờp là xã tơl khà ƀòn lơgar pa; kơnhoàl Định Hoá kung gam lơh ngan pơđơl pràn brồ guh, tơlik jơnau kờñ gơ gơs là kơnhoàl ƀòn lơgar pa tàm nam 2022.

Jăt Chủ tịch Quốc hội đơs, nam 2021, là nam krơi is ngan tài bơh tàm bơta kòp Covid-19 gơbàn kal ke mơya bol he neh bơyai lơh geh cồng nha ală broă lơh dờng màng ngan bơh dà lơgar dê, bè: Pơrjum dờng cau ala măt gùt lơgar dơ̆ XIII bơh Đảng dê, tĕ khà kuang bàng Quốc hội khoă XV mờ kuang bàng Hội đồng Nhân dân ală kấp tơngai lơh broă bơh nam 2021- 2026, Quốc hội neh sơrbac mhar ai tơlik ală broă rơndăp lơh 5 nam nàng lam lơh jăt Kơrnoăt pơrjum dờng dơ̆ XIII bơh Đảng dê tàm pơrjum dơ̆ sơnrờp tơn. Kal ke là bè hơ̆, mơya dà lơgar he kung gam sền bal lơh jăt kơnòl broă dơ̆ lĕ bal bơtàu tơnguh lơh sa mơkung rơcăng sơndră kòp.

Cau mblàng Lơ Mu K’Yến