VOV4.K’ho - Mho mờ mang òr (22/11), tàm hìu Quốc hội geh bơyai lơh dơ̆ jào pà Huy hiệu 40 sơnam Đảng, jào kơrnoăt rê rơlô jơh sơnam lơh broă bơh Bộ Chính trị gơwèt mờ ală kuang bàng geh jơng tàm Đảng Dà lơgar khoă 12 tàm Quốc hội mờ jào Huân chương gơwèt mờ ală kuang bàng Quốc hội lơh broă tờm tàm Dà lơgar khoă 14 ờ tơlik măt tĕ khà tai khoă 15.

Tàm pơrjum, Chủ tịch Quốc hội ồng Vương Đình Huệ jào Huy hiệu 40 sơnam Đảng mờ pà bơkào chờ gờm Chủ tịch Quốc hội lài do mò Nguyễn Thị Kim Ngân; Phó Chủ tịch Thường trực Quốc hội lài do mò Tòng Thị Phóng. Ala măt kuang đơng lam Đảng, Dà lơgar, Chủ tịch Quốc hội ồng Vương Đình Huệ jào Huân chương Độc lập khà 1 pà Phó Chủ tịch Quốc hội lài do ồng Phùng Quốc Hiển; jào Huân chương Độc lập khà 2 jà 8 nă kuang bàng mờ Huân chương Độc lập khà 3 pà 7 nă kuang bàng in. Chủ tịch Quốc hội ồng Vương Đình Huệ đơs tờm, ală kuang bàng dờp kơrnoăt rê rơlô jơh sơnam lơh broă mờ geh jào pà Huân chương bơh Dà lơgar dơ̆ do geh uă broă mờng chài tàm broă lơh, dờp uă gơnoar broă lơh krơi is, uă kơnòl kuơ màng tàm ală gah broă tờm dà lơgar dê, broă bơsram, bơsram tàp, lơh broă mờ gơs dờng pràn bơh ală kuang bàng là bơta àng, sòl gùng nàng ală rơnàng kơnòm să bơsram, đòm jăt bal.

Cau mblàng Ndong Brawl