VOV4.K’ho - Pơn jăt tai broă lơh mờ ală anih lơh broă tàm Quốc hội, ngai òr (26/04), Chủ tịch Quốc hội ồng Vương Đình Huệ neh đơng lam dơ̆ lơh broă mờ Thường trực Ủy ban bè ală bơta Mpồl bơtiàn, Ủy ban adăt boh lam.

Đơs tàm dơ̆ lơh broă, Chủ tịch Quốc hội ồng Vương Đình Huệ đơs là, Thường trực Ủy ban mờ Vụ ală bơta Mpồl bơtiàn pal gĭt nền nòn kơnòl, gơnoar bơh Ủy ban tàm ală gah broă bè lơh broă, broă lơh, lơh sơnơm, khà kờp làng bol, rài kis lơh broă sa mpồl bơtiàn, bơta kuơ mpồl bơtiàn, ring bal cau klao mờ cau ùr, thường trực mpồl cau ùr nghị sỹ... ndrờm là ală b roă kal ke, mhar gơtìp bơta ờ niam mờ geh broă gơrềng bal pràn.

Chủ tịch Quốc hội ồng Vương Đình Huệ sồr, Ủy ban ờ mìng sền gròi tus ală broă mpồl bơtiàn gơwèt gah broă geh lơh mờ gam pal sền gròi nền nòn tus mờ bơta mpồl bơtiàn tàm ală broă lơh sa; rơcang sền wơl broă lơh adăt boh lam; tam gơl pa, tơnguh uă bơta niam, cồng nha broă lơh bơh Ủy ban tàm ală gah broă lơh adăt boh lam, sền gròi mờ tus bal tơlĭk ală broă lơh kuơ màng bơh dà lơgar, tàm hơ̆ uă ngan là pal geh nùs nhơm bơh rài kis tàm broă pơrjum cri bơyai Quốc hội, tàm tơl rơndăp broă lơh adăt boh lam.

Cau mblàng Ndong Brawl