VOV4.K’ho - Chủ tịch Quốc hội ồng Vương Đình Huệ tus lơgar Bỉ mờ neh geh cri bơyai mờ Chủ tịch Nghị viện Châu Âu (EP) ồng David Sassoli. Chủ tịch Nghị viện Châu Âu ồng David Sassoli chờ hờp wă rò Chủ tịch Quốc hội ồng Vương Đình Huệ mờ mpồl kuang bàng ala măt dờng màng Quốc hội lơgar Việt Nam neh rơwah Nghị viện Châu Âu lơh anih tus tàm dơ̆ lơh broă sơnrờp ngan tàm gơnoar broă Chủ tịch Quốc hội lơgar Việt Nam dê.

Tàm dơ̆ cri bơyai, bàr gah neh cri bơyai ală broă nàng tơnguh mờ lơh niam rơlao tai broă lơh git gơ̆p đah bàr nghị viện, pơgồp bal tàm broă chồl pràn broă lơh bal đah lơgar Việt Nam mờ Mpồl tam klăc châu Âu tơnguh bơtàu pràn kơl dang tài bơta kuơ bơh bàr đah dê. Nàng chồl pràn broă lơh sa kă bro tơl ală bơta, Chủ tịch Quốc hội ồng Vương Đình Huệ tơlik nùs nhơm kơ̆p kờñ, Nghị viện Châu Âu (EP) geh jơnau đơs nàng nghị viện ală lơgar ờ hềt kĭ EVIPA gờñ kĭ hiệp định kuơ màng do, nàng chồl pràn broă bơcri priă, di pal mờ broă kờñ mờ bơta kuơ bơh mpồl lơh sa kă bro in, mờ pơn jăt tai ai tơl bơta niam nàng lơh jăt Hiệp định EVFTA geh cồng nha ngan.

Cau mblàng Ndong Brawl