VOV4.K’ho - Drim òr (03/06), tàm Hìu Quốc hội, Chủ tịch Quốc hội ồng Vương Đình Huệ neh geh dơ̆ cri bơyai tàm điện thoại mờ Chủ tịch Quốc hội lơgar Campuchia ồng Samdech Hengsamrin.

              Chủ tịch Quốc hội ồng Vương Đình Huệ cri bơyai tàm điện thoại mờ Chủ tịch Quốc hội lơgar Campuchia

Tàm dơ̆ cri bơyai, bàr Chủ tịch Quốc hội đơs niam ală cồng nha kuơ màng tàm broă lơh bal niam bơnĕ đah bàr lơgar tàm tơngai do. Tàm bơta kòp Covid-19, kuang đơng lam dờng bàr lơgar gam geh sùm broă tìp bal, cri bơyai sùm; ală cơ chế lơh broă bal đah bàr lơgar pơn jăt tai lơh geh cồng nha; khà kă bro bàr đah pơn jăt tai gơguh pràn, 4 nhai bồ nam 2021 geh mờr 3 tơmàn 900 tơlăk dolar Mỹ, gơguh 122% pơn drờm mờ tŭ do nam lài, pơgồp bal niam tàm broă brồ guh lơh sa đah bàr lơgar dê, tơnguh uă rài kis làng bol in.

Bàr Chủ tịch Quốc hội ring bal là, tàm broă lơh bal uă lơgar, Quốc hội bàr lơgar sùm gĭt jơnau bal bè gùng dà broă lơh mờ kờñ bal tàm ală dơ̆ cri bơyai mpồl tam klăc nghị viện tàm tiah do mờ tàm dunia bè IPU, mpồl tam klăc nghị viện dunia, Pơrjum dờng mpồl tam klăc nghị viện ală lơgar Đông Nam Á, Nghị viện ală lơgar đơs dà Tây, Mpồl duh broă Nghị viện châu Á, Nghị viện châu Á - Thái Bình Dương.

Cau mblàng Ndong Brawl