VOV4.K’ho- Drim ngai 06/12, Chủ tịch Quốc hội lơgar Lào ồng Xaysomphone Phomvihane lam bồ Mpồl kuang bang ala măt kấp dờng màng Quốc hội lơgar Lào bal mờ pơ ùr còp ngan ngồn lơgar he. Tàm Hìu Quốc hội dê, Chủ tịch Quốc hội Việt Nam ồng Vương Đình Huệ mờ pơ ùr neh đơng lam dơ̆ bơyai lơh wă rò ngan ngồn Chủ tịch Quốc hội Lào, pơ ùr bal mờ Mpồl kuang bàng ala măt kấp dờng màng Quốc hội lơgar Lào dê.

Tàm dơ̆ cribơyai broă tơnơ̆ dơ̆ bơyai lơh wă rò tơn, bàr nă Chủ tịch Quốc hội dùl nùs bal đơs bơta gĭt gơ̆p chính trị mờ lơh broă mờ lơgar ndai tàm jơh ală gah broă sùm geh sơlơ lơh niam ngan. Bulah bàr lơgar gam pal kong mờ ală bơta lòng kơn jơ̆ ngan bơh kòp dờng Covid-19 mơya kờp jơh priă lơh geh bơh kă bro đah 2 lơgar dê tàm nam 2021 lơh geh 948 tơlak dolar Mỹ, gơguh 28% pơndrờm bal dùl tŭ mờ nam lài. Bơcri priă bơh Việt Nam dê tàm lơgar Lào ơm dơ̆ pe tàm 54 lơgar gam bơcri priă tàm lơgar Lào. Bàr Chủ tịch Quốc hội neh cribơyai uă broă bè gùng dà lơh broă bal tàm tơngai tus.

Di tàm dơ̆ do, bàr Chủ tịch Quốc hội sền gŏ bal Dơ̆ bơyai lơh jàu ală măy mok lơh sơnơm bơh Quốc hội Việt Nam dê dong kờl Quốc hội Lào rơcăng sơndră kòp dờng Covid-19, kờp mờ priă là 1 tơlak dolar Mỹ.

Cau mblàng Lơ Mu K’Yến