VOV4.K’ho- Drim òr (22/11), tàm Hìu Quốc hội, sơn đờm broă lơh pơrjum dơ̆ 5 bơh Ủy ban Thường vụ Quốc hội. Geh bơyai lơh tàm 2 ngai, tàm pơrjum do, Ủy ban Thường vụ Quốc hội pơgồp jơnau đơs tàm uă tơngu me kuơ màng, tàm hơ̆ geh broă rơcang pơrjum “ni sơna” geh bơyai lơh tàm nhai 12 tus.

Đơs tàm dơ̆ sơn đờm pơrjum, Chủ tịch Quốc hội ồng Vương Đình Huệ pà git, pal kah ngan tàm pơrjum do, Ủy ban Thường vụ Quốc hội pơgồp jơnau đơs bè jơnau sồr bơh Chính phủ bè bơtơl 02 rơndăp broă Adăt tàm broă bơ̆t bơtàu adăt boh lam, kơrnoăt sồr nam 2022 là: Adăt tam gơl, bơtơl ờ uă bơta tàm Adăt Tần số vô tuyến điện; Adăt kham, sơm kòp (tam gơl). Chủ tịch Quốc hội sồr lơh loh broă pal bơtơl 2 rơndăp Adăt do, tàm hơ̆ uă ngan là kờp dŭ tơngu me broă lơh dờng sền wơl kơrnoăt tàm 2 rơndăp adăt, tơmù bơta “ai ngui nàng rơndăp anih”.

Cau mblàng Ndong Brawl