VOV4.K’ho - Tàm dơ̆ lơh broă bơh pơrjum dơ̆ bàr, Quốc hội khoă 15, drim òr (12/11), Thủ tướng Chính phủ ồng Phạm Minh Chính neh geh 90 phút hơ ală jơnau lùp bơh kuang bàng Quốc hội. Do là dơ̆ sơnrờp Thủ tướng geh hơ jơnau lùp bơh tŭ dờp guh at gơnoar broă.

Tàm dơ̆ hơ jơnau lùp, ala măt Chính phủ, Thủ tướng Chính phủ ồng Phạm Minh Chính neh ưn ngài ală kuang bàng Quốc hội, làng bol, cau tĕ khà gùt lơgar neh ring bal mờ sền gròi, pơgồp bal uă jơnau đơs jơh nùs, jăk chài, geh kơnòl bè jơnau yal bơh Chính phủ, tàm hơ̆ uă ngan là cồng nha lơh jăt rơndăp broă tơnguh bơtàu broă lơh sa mpồl bơtiàn nam 2021, kờp dŭ rơndăp broă tơnguh bơtàu lơh sa mpồl bơtiàn nam 2022 mờ đơs, tam pà bal uă ngan mờ ring nùs bal mờ broă rơcang sơndră mờ kòp Covid-19.

Thủ tướng Chính phủ ồng Phạm Minh Chính neh yal, mblàng ờ uă broă geh kuang bàng Quốc hội mờ làng bol, cau tĕ khà sền gròi, bè broă rơcang sơndră mờ kòp gơtờp, tàm hơ̆ uă ngan là tam gơl pa bồ tơngoh kơlôi sơnơng, gùng dà bal mờ broă lơh bơyai sơndră mờ kòp gơtờp jăt broă lơh gơdờp bal ờ do ờ dă, ndrờm bal, gròi sền geh cồng nha kòp Covid-19; bè broă gàr niam rài kis mpồl bơtiàn; bè ală broă lơh, broă dong kờl brồ guh mờ tơnguh bơtàu broă lơh sa mpồl bơtiàn.

Tơn jơh bàr ngai nggùl lùp mờ hơ jơnau lùp bơh ală kuang bàng tàm Chính phủ, Chủ tịch Quốc hội ồng Vương Đình Huệ đơs, Quốc hội neh lơh broă mhar, nền nòn geh kơnòl uă mờ nùs nhơm tam gơl pa; Quốc hội neh lơh gơs dơ̆ lùp mờ hơ jơnau lùp sơnrờp ngan bơh tơngai lơh broă khoă 15 dê tàm nùs nhơm lơh tờm, song dơ pă, bơ̆t bơtàu mờ neh geh cồng nha niam bơnĕ.

Cau mblàng Ndong Brawl