VOV4.K’ho- Di tus pơrjum ală Chủ tịch Quốc hội Dunia dơ̆ 5, tàm hìu lơh broă Liên hợp quốc tàm Vienna, lơgar Áo, Chủ tịch Quốc hội ồng Vương Đình Huệ neh geh dơ̆ tìp Kuang atbồ anih lơh broă năng lượng nguyên tử Dunia (IAEA) ồng Rafael Mariano Grossi.

Tàm dơ̆ wă, IAEA yal bơr geh ai 3 bơta phan lơh xét nghiệm PCR ntrờn mờ dùl khà uă phan sinh phẩm, geh rơlao 470 rơbô Euro ai lơgar Việt Nam in tàm broă rơcang sơndră mờ kòp gơtờp. Kuang atbồ IAEA pơn jờng lơgar Việt Nam tơlik măt pồ tàm Mpồl duh broă Kuang atbồ IAEA tơngai bơh nam 2021 tus 2023 mờ kơ̆p kờñ lơgar Việt Nam pơn jăt tai pơgồp bal tàm mpồl IAEA in. Chủ tịch Quốc hội ồng Vương Đình Huệ hòi jà mpồl IAEA tam pà broă lơh mờng chài, dong kờl kỹ thuật lơh gơs broă lơh adăt boh lam nàng atbồ mờ ngui geh cồng nha năng lượng nguyên tử nàng tơnguh bơtàu lơh sa, lòt bal mờ sền gàr tiah kis mờ rơcang sơndră mờ tam gơl trồ tiah, dong kờl lơgar Việt Nam ngui công nghệ, bơto bơtê mờ tơnguh uă bơta pràn lơh broă bè ngui công nghệ hạt nhân tàm gah lơh sơnơm, rơcang sơndră mờ kòp Covid-19.

Cau mblàng Ndong Brawl