VOV4.K’ho- Lam lơh broă lơh tìp mat cau tĕ khà tơnơ̆ pơrjum, drim ngai 17/11, tàm quận Hải An, ƀòn dờng Hải Phòng, Chủ tịch Quốc hội ồng Vương Đình Huệ bal mờ ală kuang bàng Quốc hội ƀòn dờng Hải Phòng neh tìp mat cau tĕ khà nàng yal bè cồng nha pơrjum dơ̆ 2, Quốc hội khóa 15 mờ broă lơh bơh Mpồl kuang bàng Quốc hội ƀòn dờng Hải Phòng dê tàm pơrjum. Ala mat mpồl kuang bàng Quốc hội, Phó Kuang atbồ Mpồl kuang bàng Quốc hội ƀòn dờng Hải Phòng ồng Lã Thanh Tân neh yal mờ cau tĕ khà bè tơngume cồng nha bơh pơrjum dơ̆ 2, Quốc hội khóa 15 dê.

Chủ tịch Quốc hội tìp mat cau tĕ khà ƀòn dờng Hải Phòng

Cih dờp ală jơnau dan, jơnau sồr ndai bơh cau tĕ khà dê gơ rềng tus ală broă, Chủ tịch Quốc hội ồng Vương Đình Huệ sồr Hội đồng Nhân dân, Ủy ban Nhân dân ƀòn dờng Hải Phòng cih dờp ală jơnau dan, jơnau sồr gơ wèt gơnoar bơh ƀòn dờng dê. Mpồl kuang bàng Quốc hội ƀòn dờng geh tơrgùm, yal Quốc hội in cih dờp ală jơnau dan, jơnau sồr gơ wèt gơnoar bơh Quốc hội dê. Ală jơnau dan, jơnau sồr gơ wèt gơnoar bơh Chính phủ dê, mpồl kuang bàng Quốc hội ƀòn dờng Hải Phòng geh dan nàng Chính phủ bơsong.

Cau mblàng K’Duẩn