VOV4.K’ho- Tàm càr lơgar Brussels, lơgar Bỉ, Chủ tịch Quốc hội ồng Vương Đình Huệ neh tìp mat cribơyai broă mờ Chủ tịch Hội đồng Châu Âu ồng Charles Michel. Đơs niam bơta kuơ bơh dơ̆ lòt còp mờ lơh broă tàm EU dơ̆ do bơh mpồl kuang bàng dờng màng Quốc hội Việt Nam dê tơnơ̆ dùl tŭ tơngai jŏ jòng gơtìp gơ rềng tài bơh kòp bơtờp, Chủ tịch EC đơs là, kòp Covid-19 gơlik geh kal ke tàm làm gùt dunia neh gơ rềng tus tŭ tơngai mờ cồng nha broă lơh jat Hiệp định EVFTA; đơs nền mờr tus 2 gah pal ngui jơh bơta pràn dờng màng mờ hiệp định do cèng wơl.

Chủ tịch Charles Michel tam pà nùs nhơm bè ring lơngai mờ lơngap lơngai tàm Ấn Độ Dương- Thái Bình Dương, kơrnuat pal jat là lài ngan sền dờng màng adat boh lam mờ đơs nền EU kờñ rề ơnàng mờ lơh niam rlau tai broă lơh bal mờ tiah Đông Nam Á, tàm hơ̆ geh Việt Nam. Chủ tịch Quốc hội ồng Vương Đình Huệ đơs nền, Việt Nam pơn jat tai pơgồp bal jơh nùs mờ EU mờ EP tàm ală cơ chế lơh broă bal uă lơgar; rơcang lơh rbàng tơrbŏ tơnguh git gơp đah EU mờ ASEAN dipal mờ broă lơh bal jŏ jòng ASEAN- EU pa kĭ.

Cau mblàng K’Duẩn