VOV4.K’ho- Mho ngai 12/7, tàm hìu lơh broă Quốc hội, ồng Vương Đình Huệ -Chủ tịch Quốc hội neh tìp mat cribơyai pờ tơlik tơn tàm internet mờ Chủ tịch lơgar Hungary ồng László Kövér. Chủ tịch Quốc hội ồng Vương Đình Huệ đơs niam ngan ală bơta bơtàu tơnguh uă ngan tàm bơta gĭt gơ̆p 2 lơgar dê tàm tơngai pa do, đơs nền Việt Nam sùm sền dờng màng mờ kơ̆p kờñ sơlơ tơnguh bơta gĭt gơ̆p lơh broă bal uă gah mờ lơgar  Hungary– là lơgar lơh broă bal tơl làm sơnrờp bơh Việt Nam dê tàm tiah Trung- Đông Âu.

Chủ tịch Quốc hội ồng Vương Đình Huệ đơs ngan, Việt Nam tŭ lơi kung kờñ lơh rbàng tàm tơrbŏ bal ai lơgar Hungary in pờ ơnàng bơta gĭt gơ̆p lơh broă bal mờ ală lơgar tàm tiah ASEAN mờ sơlơ̆u wơl, Việt Nam kơ̆p kờñ Hungary pơn jat tai dong kờl, tơnguh pràn rlau tai bơta gĭt gơ̆p đah Việt Nam mờ ală lơgar tàm Mpồl tam klăc châu Âu kung bè ală lơgar tàm mpồl tàm tiah do dê. Tàm dơ̆ tìp mat cribơyai, 2 Chủ tịch Quốc hội ndrờm đơs nền digơlan rơ̆p geh ală broă lơh pơgồp bal bơh dơ̆ pơrjum bơh Ủy ban tàm bơrlŭ bal ală Chính phủ dê geh bơyai lơh tàm nhai 10 tus do, ngan là lơh pràn lơh broă bal tàm gah công nghệ thông tin, viễn thông; pơn jat tai dong kờl, tam pà bal bơta mờng chài tàm broă lơh bơt bơtàu adat boh lam, sền gròi broă lơh bơh Kuang bàng Dà lơgar dê...

Cau mblàng K’Hạnh