VOV4.K’ho- Di Ngai Cau pơgrru Việt Nam 20/11, mho ngai 19/11, Chủ tịch Quốc hội ồng Vương Đình Huệ neh tus bal dơ̆ bơyai lơh Sơnđờm mŭt nam bơsram 2021- 2022 mờ tìp măt, kah rơngal ală cau pơgru tàm Hìu bơsram Đại học Y Hà Nội. Ala măt Kuang bàng đơng lam bồ Đảng, Dà lơgar, Chủ tịch Quốc hội ồng Vương Đình Huệ tơlik nùs nhơm kah rơngal, jờng rơ ală tă pơgồp, phi să ngềt ngơ̆t bơh mpồl kuang bàng, ƀác sĩ, cau lơh broă gah lơh sơnơm dê, ală cau pơgru mờ cau bơsram dờng hìu bơsram dê; ală cau neh ờ rơngòt bơta sơbơng roh, tŭ lơi kung rơcăng ai bơta pràn kơldang să jan màng kis bơh he dê, lòt mŭt tàm tiah bơtờp uă kòp, tă pơgồp dà kơlhề jơh bơta pràn he dê, sền gàr pràn kơldang să jan, màng kis mờ rài kis lơngăp lơngai bơh Làng bol dê.

Yal lài, kòp dờng Covid-19 gam gơbàn kal ke, ờ gơtùi gĭt lài, mơya mờ bơta tă pơgồp bal pràn, dùl nùs bal bơh jơh gùt jơi bơtiàn dê, mờ nùs nhơm kơ̆ dơn mờ bơta kơ̆p kờñ ngan gĭt lơh bal mờ ală mờng chài geh kuơ ngan bơh mpồl cau lơh sơnơm dê, bơta tus bal bơh jơh ală anih lơh broă chính trị dê, Chủ tịch Quốc hội ồng Vương Đình Huệ pin dờn, dà lơgar geh gờñ gròi sền geh jơh kòp bơtờp, sền gàr pràn kơldang să jan bơh làng bol dê, bơtàu tơnguh wơl mờ bơtàu tơnguh lơh sa- mpồl bơtiàn.

Cau mblàng Lơ Mu K’Yến