VOV4.K’ho- Di dơ̆ tơngkah kir sơnrai Ngai Cau lơh sa kă bro Việt Nam 13/10, Chủ tịch Quốc hội ồng Vương Đình Huệ tìp măt mờ Mpồl ală mpồl lơh sa kă bro bơh “Cribơyai ală Kuang đơng lam bồ mpồl lơh sa kă bro Việt Nam mờ jờng rơ muh mat ală Măt kă bro pràn”. Cih dờp jơnau đơs tă pơgồp bơh kuang đơng lam bồ ală mpồl lơh sa kă bro dê tàm dơ̆ tìp măt, Chủ tịch Quốc hội ồng Vương Đình Huệ đơs là, do kung là gùng dà, broă lơh bơh Đảng, Quốc hội mờ Chính phủ dê tàm tơngai pa wèt tus bơtàu tơnguh wơl, dong kờl gơguh lơh sa mờ bơtàu tơnguh kơ̆ kơl jăp jŏ jòng.

Tàm broă rơndăp lơh rơndăp tăp sèng wơl lơh sa bơh 05 nam tus dê kung bè broă rơndăp lơh sơnđờm bơh nam 2022, Ủy ban Thường vụ Quốc hội neh cribơyai mờ ring bal uă ngan, là rơndăp tăp sèng wơl rài lơh sa gơ jăt bal mờ broă lơh jơh ală bơta gơdờp, bơtàu tơnguh wơl mờ bơtàu tơnguh lơh sa- mpồl bơtiàn, tơnguh bơta lơh tờm is bơh rài lơh sa dê, tơnguh bơta tơl pràn kong jai, gơdờp mờ bơta gơ tam gơl ờ niam, ală bơta gơrềng tài bơh ờ kơ̆ kơl jăp lơh sa dờng tàm đah bơdìh halà ală broă gơrềng tus tam gơl trồ tiah halà kòp bơtờp.

Cau mblàng Lơ Mu K’Yến