VOV4.K’ho - Lơh jăt broă tìp mờ cau tĕ khà tơnơ̆ mờ pơrjum dơ̆ sơnrờp, Quốc hội khoă 15, drim òr (05/08), Chủ tịch Quốc hội ồng Vương Đình Huệ mờ Mpồl kuang bàng Quốc hội ƀòn dờng Hải Phòng neh bơyai lơh tìp mờ cau tĕ khà jăt broă lơh pờ tơlĭk tàm internet tus jơh ală quận, kơnhoàl, thị trấn tàm ƀòn dờng Hải Phòng mờ rơlao 200 anih pờ bal mờ 5 rơbô nă cau tĕ khà tus bal.

Ring bal mờ đơs niam jơnau yal cồng nha bơh dơ̆ pơrjum, ală cau tĕ khà đơs là, pơrjum dơ̆ sơnrờp, Quốc hội khoă 15 neh tơlĭk niam ngan nùs nhơm bơh Chủ tịch Hồ Chí Minh là “Kơ̆ dơn ờ tam gơl, ngăc ngar di pal mờ bơta tam gơl”. Quốc hội neh ngăc ngar ngan, gĭt ală bơta tàm dà lơgar, lơh ndrờm bal, geh kơnòl tŭ bơtơl Nghị quyết pơrjum dơ̆ sơnrờp mờ ală tơngu me ờ hềt tŭ lơi geh, jào Chính phủ, Thủ tướng Chính phủ ală tơngu me adăt boh lam geh kuơ nàng rơcang lơh ndrờm bal rơlao tàm broă đơng lam, lam sồr rơcang sơndră mờ kòp Covid-19. Hơ jơnau lùp bơh cau tĕ khà bè broă tơnguh bơtàu nhơl chờ mờ lơh sa dà lềng tàm Bạch Long Vĩ mờ Cát Bà, Chủ tịc Quốc hội ồng Vương Đình Huệ đơs là, broă do geh kuơ màng tus mờ broă sền gàr bơta lơngăp lơngai dà lơgar, den tàng pal pơgồp bal broă tơnguh bơtàu lơh sa dà lềng mờ broă sền gàr lơngăp lơngai dà lơgar, sền gàr bơta niam ù tiah, trồ tiah, bơta kuơ ù tiah geh is ờ hoan geh ngan.

Cau mblàng Ndong Brawl