VOV4.K’ho- Ngai òr (10/05), tàm kơnhoàl Tiên Lãng, Chủ tịch Quốc hội ồng Vương Đình Huệ bal mờ ală cau tơlĭk măt tĕ khà kuang bàng Quốc hội khoă 15 pơn jăt tai broă tìp mờ cau tĕ khà mờ lam sồr tĕ khà tàm mpồl tĕ khà sồ 3, ƀòn dờng Hải Phòng, tàm hơ̆ geh ală quận, kơnhoàl Kiến An, Dương Kinh, An Lão, Tiên Lãng mờ Vĩnh Bảo.

Chủ tịch Quốc hội ồng Vương Đình Huệ yal broă lơh bơh să tờm ồng dê tàm dơ̆ tìp măt mờ cau tĕ khà

Tàm pơrjum, cau tĕ khà kơnhoàl Tiên Lãng ring nùs bal mờ broă lơh bơh ală kuang bàng, mờ tơlĭk nùs nhơm pin dờn tàm tơl nă cau tơlĭk măt tĕ khà. Cau tĕ khà tàm kơnhoàl kơ̆p kờñ ală kuang bàng tŭ geh pồ pal tơnguh niam bơta pràn, bơta ngăc ngar, kơnòl kuơ màng bơh cau ala măt Quốc hội rềp mờ làng bol rơlao, iăt mờ gĭt jơnau bal bơh jơnau đơs làng bol dê.

Ala măt ală cau tơlĭk măt tĕ khà kuang bàng Quốc hội tàm mpồl tĕ khà sồ 3, Chủ tịch Quốc hội ồng Vương Đình Huệ neh ưn ngài, dờp ală jơnau đơs pơgồp bal jơh nùs, geh kơnòl bơh ală cau tĕ khà. Mờ đơs, di lah geh pồ geh lơh jăt niam gơnoar, kơnòl kuơ màng bơh kuang bàng dê, lơh gơs ală jơnau hơ mờ cau tĕ khà, tàm hơ̆ uă ngan là sùm rềp mờ làng bol, đềt mềr mờ làng bol, là cau tơrbŏ jơnau đơs, nùs nhơm kơ̆p gơn bơh cau tĕ khà, bơh làng bol dê tus mờ Quốc hội.

Cau mblàng Ndong Brawl