VOV4.K’ho- Tàm ngai 09/9, jăt jiơ tiah do dê, Chủ tịch Quốc hội Việt Nam ồng Vương Đình Huệ mờ Mpồl kuang bàng ala măt kấp dờng màng Quốc hội Việt Nam neh tus bal Cribơyai mpồl lơh sa kă bro Việt Nam mờ Bỉ. Đơs mờ ală mpồl lơh sa kă bro khà dùl bơh lơgar Bỉ dê, ồng Vương Đình Huệ đơs niam ngan broă bơceh lơh bơyai lơh Cribơyai sềm do là tŭ tơngai niam nàng bal mờ gơ̆p tam pà bal bè ală gùng dà bơcri priă pa, broă lơh lơh niam wơl tiah bơcri priă bơh Việt Nam dê mơkung geh ală jơnau sồr lơh nàng kờñ tơnguh uă cồng nha lơh broă, wèt tus bơta lơh geh cồng nha bơh ală mpồl lơh sa kă bro lơgar Bỉ dê tŭ bơcri priă mờ kă bro tàm lơgar Việt Nam.

Nàng tơnguh rlau tai bơta gĭt gơp lơh sa, kă bro, bơcri priă đah Việt Nam mờ Bỉ tàm tơngai tus, ngui ală tŭ tơngai niam pa tơnơ̆ tơngai gơbàn kòp dờng Covid-19, ồng Vương Đình Huệ neh yal bàr pe gùng dà pơlam lơh tàm tơngai tus. Tàm hơ̆, sồr mpồl lơh sa kă bro mờ ală Mpồl tam klăc ală mpồl lơh sa kă bro lơgar Bỉ dê dong kờl bal pràn kơldang nàng Nghị viện Bỉ gờñ lơh sir gơs ală sră nggal wèt tus kĭ ring bal Hiệp định Sền gàr bơcri priă đah Việt Nam mờ Mpồl tam klăc châu Âu (EU) (EVIPA) tàm tơngai gờñ ngan rlau jơh. Sền swì pờ gùng par tơn tàm tơrbŏ bal đah lơgar Bỉ mờ Việt Nam nàng dong tơnguh ală broă lơh lơh broă bal lơh sa, nhơl chờ, bơto bơtê, tìp măt lơh queng bal làng bol đah 2 lơgar sơlơ rềp mềl bal rlau tŭ kòp dờng geh gròi sền.

Cau mblàng Lơ Mu K’Yến