VOV4.K’ho- Mho ngai 5/9, ồng Vương Đình Huệ- Chủ tịch Quốc hội mờ mpồl Kuang bàng kấp dờng màng Quốc hội lơgar he neh tus ƀlàng rơndeh par Schwechat, càr lơgar Viên, lơgar Áo tus bal Pơrjum ală Chủ tịch Quốc hội dunia, còp mờ lơh broă mờ Nghị viện châu Âu (EP), lơgar Bỉ mờ còp ngan ngồn lơgar Phần Lan. Jat broă rơndap lơh, tơnơ̆ tŭ tus lơgar Áo, ồng Vương Đình Huệ tìp mat, tơm bơh bơr tơn mờ Kuang bàng Đại sứ quán Việt Nam tàm lơgar Áo; ala mat Mpồl bơtiàn làng bol Việt Nam kis tàm lơgar Áo, Czech, Hungary, Slovakia. Do geh sền bè dùl dơ̆ tìp mat mờ cau tĕ khà kuơ màng ngan bơh Chủ tịch Quốc hội dê mờ làng bol kis tàm lơgar ndai. Tus bal pơrjum ală Chủ tịch Quốc hội dunia dơ̆ 5, tàm ală dơ̆ pơrjum, ồng Vương Đình Huệ geh ală jơnau đơs kuơ màng di pal mờ bơta mờ broă lơh bơh Việt Nam dê. Bơdìh hơ̆, ală Kuang bàng tàm mpồl bơh Kuang bàng kấp dờng màng Quốc hội Việt Nam dê kung tus bal tàm ală dơ̆ cribơyai geh gơrềng tus ală tơngume bè: broă sền gàr tiah ơm kis, tam gơl sồ, broă ring bal ùr klau, jàu gơnoar ai cau ùr mờ ơruh pơnu in, broă adat boh lam dunia mờ uă broă ndai cèng bal bơta tàm gùt plai ù.

Chủ tịch Quốc hội ồng Vương Đình Huệ tìp mat Đại sứ quán Việt Nam tàm Áo

Bơdìh dơ̆ pơrjum, ồng Vương Đình Huệ gam geh ală dơ̆ tìp mat 2 gah mờ Chủ tịch Quốc hội ală lơgar, tàm hơ̆ geh ală lơgar lơh broă bal jŏ jòng, lơgar lơh broă bal tơl làm kung bè lơgar lơh broă bal ờs mờng bơh Việt Nam dê. Do là tŭ tơngai niam, nàng kờñ yal  jơnau tơngĭt bơh Việt Nam dê tus mờ kuang đơng lam bồ ală lơgar bè bơta kơ̆p kờñ bơh Việt Nam dê, pơn jat tai sơlơ tơnguh bơta gĭt gơ̆p lơh bơyô ờs mờng, kung bè lơh broă bal uă gah bè lơh sa, kă bro, bơcri priă, khoa học, bơto bơtê, kỹ thuật; kung bè sơlơ tơnguh bơta gĭt gơ̆p Nghị viện mờ ală lơgar.

Cau mblàng K’Hạnh