VOV4.K’ho- Dờp jơnau jà bơh Chủ tịch Quốc hội Phần Lan ồng Anu Vehvilainen, Chủ tịch Quốc hội ồng Vương Đình Huệ bal mờ mpồl kuang bàng dờng màng Quốc hội lơgar he sơn đờm dơ̆ lòt còp ngan ngồn lơgar Phần Lan tàm 2 ngai, 10 mờ 11/9. Dơ̆ lòt còp ngan ngồn bơh Chủ tịch Quốc hội Việt Nam dê tơnơ̆ 28 nam kờñ tơnguh mờ lơh niam rlau tai git gơp lơh bơyô ờs mờng mờ lơh broă bal uă gah mờ Phần Lan đơs bal, mờ Quốc hội Phần Lan đơs is; lơh gơlik ală bơta kơp kơnờm lơh broă bal pa tàm git gơp đah 2 lơgar kung bè lơh broă bal tàm ală tiah mờ tàm dunia.

Tàm dơ̆ lòt còp ngan ngồn do, Chủ tịch Quốc hội ồng Vương Đình Huệ tus lùp còp Kuang atbồ lơgar Phần Lan; tìp mat cribơyai broă mờ Thủ tướng Phần Lan; tìp mat cribơyai broă mờ Chủ tịch Quốc hội Phần Lan; wă ală thị trưởng; cribơyai kơ ƀàng wil mờ 2, 3 CEO tập đoàn dờng bơh lơgar Phần Lan; sền dơ̆ kĭ sră pơrgon bơh 2, 3 mpồl lơh sa kă bro Việt Nam mờ Phần Lan dê; tìp mat Đại sứ quán mờ ala mat mpồl cau Việt Nam tàm Phần Lan.

Cau mblàng K’Duẩn