VOV4.K’ho- Drim òr (30/06), tàm ƀòn dờng Buôn Ma Thuột, càr Dak Lak geh bơyai lơh pơrjum dơ̆ sơnrờp, Hội đồng Nhân dân (HĐND) càr khoă 10, tơngai bơh nam 2021 tus 2026. Chủ tịch Quốc hội ồng Vương Đình Huệ tus sơn đờm pơrjum.

Chủ tịch Quốc hội ồng Vương Đình Huệ tus sơn đờm mờ geh jơnau đơng lam tàm pơrjum Hội đồng Nhân dân càr Dak Lak khoă 10

Chủ tịch Quốc hội ồng Vương Đình Huệ jào pà bơkào chờ gờm ală kuang bàng pa geh pồ

Tàm pơrjum do, Ủy ban tĕ khà càr Dak lak neh dờp gơnoar broă 75 nă kuang bàng HĐND càr khoă 10, tơngai bơh nam 2021 tus 2026; mờ pồ ồng Y Vinh Tơr, Phó Chủ tịch thường trực HĐND càr Dak Lak khoă 9 lơh Chủ tịch HĐND càr mờ khà sră pồ geh 98,66%. Pồ ồng Phạm Ngọc Nghị, Chủ tịch Ủy ban Nhân dân (UBND) càr tơngai bơh nam 2016 tus 2021 geh at tai gơnoar broă Chủ tịch UBND càr Dak Lak tơngai bơh nam 2021 tus 2026 mờ khà sră pồ geh 100%.

Đơs tàm dơ̆ pơrjum, Chủ tịch Quốc hội ồng Vương Đình Huệ đơs tờm, kuang bàng HĐND pal tơnguh nùs nhơm lam lài, khin kơlôi, khin lơh, khin dờp kơnòl bơh cau ala măt làng bol mờ cau tĕ khà; tàm hơ̆ uă ngan là broă rơcang lài, bơceh lơh, tus bal tam gơl pa tàm broă sền gròi, lùp sền, lùp, tìp mờ cau tĕ khà, wă làng bol, tus bal pơgồp jơnau đơs tàm broă bơ̆t bơtàu adăt boh lam. Chủ tịch Quốc hội ồng Vương Đình Huệ sồr, tàm tơngai bơh nam 2021 tus 2026, HĐND càr Dak Lak khoă 10 pal pơn jăt tai tam gơl pa pràn kơl dang, tơnguh uă bơta niam mờ geh cồng nha rơlao tai, pơn jăt tai ai càr Dak Lak gơs dùl tàm ală càr gơguh lơh broă sa, geh bơta niam, bơta gơdờp bal tàm tiah lơh sa Tây Nguyên dê.

Cau mblàng Ndong Brawl