VOV4.K’ho- Di dơ̆ tus bal Pơrjum ală Chủ tịch Quốc hội dunia dơ̆ 5, Chủ tịch Quốc hội ồng Vương Đình Huệ neh wă Phó Chủ tịch Hạ viện lơgar Anh mò Eleanor Laing.  Chủ tịch Quốc hội ồng Vương Đình Huệ đơs nền, Anh là lơgar lơh broă bal kă bro dờng dơ̆ 3 bơh lơgar Việt Nam dê tàm drà kă bro châu Âu, Hiệp định kă bro khat gơboh geh lơh jat ngan ngồn bơh ngai 01/5/2021, lơh gơlik bơta niam tơnguh pràn rlau tai kă bro bal đah 2 lơgar. Tus tŭ do, Anh geh 421 rơndap broă bơcri priă tàm lơgar Việt Nam, mờ kờp jơh priă bơcri 3 tơmàn 920 tơlak dolar Mỹ.

Chủ tịch Quốc hội ồng Vương Đình Huệ đơs ngan, Việt Nam kờñ Anh sơlơ tơnguh git gơp lơh sa kă bro mờ tiah do mờ tŭ lơi kung kờñ dong lơgar Anh tàm broă cribơyai bal nàng tus bal Hiệp định lơh broă bal tơl làm mờ gơguh jak gùt Thái Bình Dương. Chủ tịch Quốc hội ồng Vương Đình Huệ đơs là, 2 lơgar pal sền gròi bơt bơtàu ală broă lơh lơh broă bal geh cồng nha, dipal mờ bơta pràn mờ git gơp lơh broă bal jŏ jòng đah 2 lơgar.

Cau mblàng K’Duẩn