VOV4.K’ho - Pơn jăt tai dơ̆ tus còp mờ lơh broă tàm ală càr Tây Nguyên, ngai òr (01/07), Chủ tịch Quốc hội ồng Vương Đình Huệ neh lơh broă mờ kuang đơng lam càr Dak Nông.

                Chủ tịch Quốc hội ồng Vưong Đình Huệ lơh broă mờ kuang bàng đơng lam càr Dak Nông

Đơs tàm dơ̆ lơh broă, Chủ tịch Quốc hội ồng Vương Đình Huệ đơs niam càr Dak Nông neh bơyai lơh geh cồng nha dơ̆ tĕ khà kuang bàng Quốc hội mờ kuang bàng Hội đồng Nhân dân ală cấp; tơnơ̆ mờ pơrjum dờng Đảng, càr neh pồ tơl kuang bàng ală cấp bơh càr, kơnhoàl tus xã; lam lơh broă lơh jăt Nghị quyết pơrjum dờng Đảng gùt lơgar dơ̆ 13 mờ Nghị quyết pơrjum dờng Đảng bộ càr dơ̆ 12 nền nòn.

                    Chủ tịch Quốc hội ồng Vương Đình Huệ geh jơnau đơng lam tàm broă lơh broă

Prao nhai bồ nam do, broă lơh sa mpồl bơtiàn càr dê geh ring niam, pơn jăt tai gơguh 6,03%, do là broă lơh ngan pal geh dờp, pơn drờm mờ khà geh bal bơh gùt lơgar dê; tă dia dà lơgar geh 58%. Chủ tịch Quốc hội ồng Vương Đình Huệ đơs tờm, tàm bơta sền gròi niam kòp gơtờp, càr Dak Nông geh bơta niam brồ guh pràn, tơnguh broă pơgồp bal đah ală tiah, pơgồp bal đah ai mờ đah kờñ, chồl pràn bơcri priă dà lơgar; bơ̆t bơtàu tai rơndăp broă lơh sa suơn sre, tơnguh bơtàu ală phan geh lơh tờm. Dùl tàm ală broă kal ke ngan càr Dak Nông dê tàm tơngai do, hơ̆ là broă làng bol kis ntrờn. Chủ tịch Quốc hội ồng Vương Đình Huệ đơs tờm, càr pal bơ̆t bơtàu gơs dùl tơngu me tờm, bơsong jơh bàr đah lòt mờ tus.

Kung tàm ngai òr (01/07), Chủ tịch Quốc hội ồng Vương Đình Huệ bal mờ mpồl kuang bàng lơh broă neh tus còp mờ pà phan ai kuang bàng, cau ling Kuang àng càr Dak Nông in. Broă lơh do neh tơn jơh dơ̆ tus còp bơh Chủ tịch Quốc hội ồng Vương Đình Huệ dê tàm ală càr Tây Nguyên.

Cau mblàng Ndong Brawl