VOV4.K’ho- Đơs tàm dơ̆ lơh broă mờ Sền kờp priă jền dà lơgar tàm mho ngai 12/8, ồng Vương Đình Huệ- Chủ tịch Quốc hội sồr, broă tờm tàm nam 2022 bơh Sền kờp priă jền dà lơgar là lơh jăt broă yal tơrgùm kờp jơh gơrềng tus lơh jăt broă tềm pềr mờ tam dră pơhì pơhà tơngai bơh nam 2016- 2021 tàm ală gah broă lơh bè jơtài dà lơgar, phan kuơ geh is tàm ù, ù tiah.

Jờng rơ ngan gơnoar broă bơh Sền kờp priă jền dà lơgar dê tàm tơngai lài, Chủ tịch Quốc hội ồng Vương Đình Huệ đơs là, gah sền kờp priă jền dà lơgar neh iăt kơno mờng chài bơh dunia dê, đòm jăt ngăc ngar tàm broă mùl gŏ krơi is bơh Việt Nam dê, cồng nha sền kờp priă jền dà lơgar ngai sơlơ gơguh tai, lơh gơs gơnoar broă ngai sơlơ uă, là anih lơh broă sền swì jơtài dà lơgar geh kơnòl mờ geh bơngă pin dờn.

Tơngai tus, ồng Vương Đình Huệ sồr, Mpồl kuang bàng đơng lam Đảng Sền kờp priă jền dà lơgar dê pal lơh Rơndăp broă lơh lơh sir mpồl kuang bàng tơnguh uă bơta gơtùi lơh broă, cồng nha lơh broă bơh sền kờp priă jền dà lơgar dê, jàu broă rơndăp lơh lam lơh broă lơh sền kờp priă jền dà lơgar tus nam 2030, ơn tàm bơta tơrgùm jơh bal lơh jăt Kơrnoat dơ̆ 13 bơh Đảng dê mờ ală Kơrnoat geh gơrềng tàm 5 nam tus.

Cau mblàng Lơ Mu K’Yến