VOV4.K’ho- Mho mang ngai 07/7, tàm hìu lơh broă Quốc hội, Chủ tịch Quốc hội ồng Vương Đình Huệ neh tìp mat cribơyai broă pờ tơn tàm internet mờ Chủ tịch Hạ viện lơgar Marocco ồng Habid El Malki. Tàm dơ̆ cribơyai broă, 2 nă kuang đơng lam bồ đơs nền, Việt Nam mờ Marocco geh git gơp lơh bơyô ờs mờng niam bơnĕ, 2 lơgar bulah ơm ngài bè ù tiah mơya geh uă bơta ndrờm bal bè kah yau mờ broă bơtàu tơnguh, ndrờm là ală lơgar gam bơtàu tơnguh, lơgar geh jơng bơh Mpồl ală lơgar ờ tơrgùm bal mờ Mpồl ală lơgar đơs dà Tây dê. Do là bơnàng jă ƀuơn ƀuài ai broă bơtàu tơnguh git gơp lơh broă bal 2 lơgar tàm ală gah tàm tơngai tus.

Bàr gah pơn jat tai tơngguh cơ chế pơgồp bal jơh nùs tàm ală dơ̆ cribơyai uă lơgar bè IPU, APF mờ ală mpồl nghị viện uă lơgar ndai; kờñ gùng dà bơh tơl lơgar dê bè ală broă mờ tiah do kung bè dunia sền gròi bal. Pơgồp bal kờp sền, gròi sền broă lơh jat ală hiệp định mờ jơnau ring bal neh kĭ đah Chính phủ mờ ală Bộ, gah broă lơh 2 lơgar, nàng ală hiệp định do geh lam lơh jat dùl ròt, cèng wơl cồng nha mờ bơta kuơ ngan ngồn, dipal mờ git gơp chính trị niam bơnĕ đah 2 lơgar.

Cau mblàng K’Duẩn