VOV4.K’ho- Drim ngai 23/8, pơrjum Đại hội đồng Liên nghị viện ală lơgar ASEAN dơ̆ 42 (AIPA – 42) mờ tơngume “Bơtàu tơnguh git gơp lơh broă bal nghị viện tàm gah kỹ thuật sồ gơ glòm jơh wèt tus Mpồl bơtiàn ASEAN nam 2025” neh ngan ngồn mut lơh tềng đap bơta đơng lam bơh Chủ tịch AIPA, Chủ tịch Mpồl duh broă crơng gơs adat boh lam lơgar Brunei Darussalam ồng Pehin Dato Abdul Rahman Taib jat broă lơh pờ tơn tàm internet. Mpồl kuang bàng dờng màng Quốc hội Việt Nam bơh Chủ tịch Quốc hội ồng Vương Đình Huệ lơh kuang atbồ mpồl neh tus bal pơrjum AIPA dơ̆ 42 tàm anih pờ tơlik tơn tàm Hà Nội, lơgar Việt Nam.

Jat broă lơh, ƀùi drim dơ̆ pơrjum gùt mpồl dơ̆ 1 geh lơh mờ uă tơngume kuơmàng. Ƀùi mho, Chủ tịch Quốc hội ồng Vương Đình Huệ geh jơnau đơs kuơmàng, tơrgùm sền sơ wì broă dunia, broă tàm tiah do, bơh hơ̆ tơnguh bơta kuơ bơh lơh broă bal uă lơgar mờ bơta tam klac bal, ring bal bơh ASEAN dê; cih dờp ală broă lơh ngan bơh mpồl ASEAN mờ ală lơgar geh jơng tàm mpồl dê tàm broă sền gròi kòp Covid-19; đơs nền broă lơh ngan bơh Việt Nam dê tàm broă lơh rơcang sơndră kòp Covid-19 mờ nùs nhơm bơh Việt Nam dê bè lơh broă bal tàm gah sơnơm vaccine.

Cau mblàng K’ Duẩn