VOV4.K’ho- Mho ngai 15/4, tàm hìu lơh broă Quốc hội geh bơyai lơh Pơrjum bơh Ủy ban Thường vụ Quốc hội mờ ală Kuang bàng lơh kơnòl broă sùm tàm dà lơgar. Do là pơrjum sơnrờp bơh Ủy ban Thường vụ Quốc hội tìp mat Kuang bàng Quốc hội lơh kơnòl broă sùm tơnơ̆ tŭ pồ tơl Kuang bàng. Ồng Vương Đình Huệ, Chủ tịch Quốc hội đơng lam pơrjum.

Đơs tàm dơ̆ sơnđờm mut pơrjum, ồng Vương Đình Huệ Chủ tịch Quốc hội đơs loh, tàm rơndap cih Nghị quyết yal tàm pơrjum dơ̆ 11, Quốc hội khoá 14 bè broă lơh tơngai lơh broă bơh nam 2016 -2021 bơh Quốc hội dê, geh 8 tơngume mờ Quốc hội khóa 15 pal lơh jat, Quốc hội ngan ngồn là anih lơh broă Kuang bàng ala mat dờng ngan rlau jơh bơh Làng bol dê. Ủy ban Thường vụ Quốc hội iăt, kơno, pơn jat tai iăt, kơno ală jơnau đơs bơh ală Kuang bàng Quốc hội lơh kơnòl broă sùm dê, tă pơgồp jơnau đơs ai broă lơh tam gơl pa in, tơnguh uă rlau tai bơta niam, geh cồng nha bơh Quốc hội dê.

Tàm tơngai tus do, Quốc hội geh bơt bơtàu broă lơh lơh broă nàng lơh jat Nghị quyết Pơrjum dờng dơ̆ 13 bơh Đảng dê. Tàm hơ̆ geh lơh jat tơl rơndap broă lơh krơi is, mờ bơta pơgồp bal, tus bal bơh ală anih lơh broă đơng lam dê mờ ală tơngai lơh broă ngan ngồn. Tơngai tus, Kuang đơng lam bồ Quốc hội geh tơngai lơh broă ngan ngồn mờ Hội đồng jơi bơtiàn kòn cau, tơl Ủy ban, anih lơh broă bơh Quốc hội dê bơt bơtàu broă rơndap lơh, ai ngui Nghị quyết pơlam gùng dà broă lơh bè bơt bơtàu adat boh lam tàm tơngai lơh broă tus do.

Cau mblàng K’Hạnh