VOV4.K’ho - Ngai òr (06/09), tàm Cơldŭ kă bro lơgar Áo, càr lơgar Vienna neh bơyai lơh pơrjum cri bơyai Mpồl lơh sa kă bro lơgar Việt Nam mờ lơgar Áo, bơh Đại sứ quán Việt Nam, Bộ Kế hoạch mờ Đầu tư mờ Cơdŭ kă bro lơh sa lơgar Áo bơyai lơh bal. Geh gal mpồl lơh sa kă bro lơgar Việt Nam mờ ala măt rơlao 20 mpồl lơh sa kă bro tàm ală gah broă priă jền, ngân hàng, lơh sơnơm, bơto pơlam, gùng lòt, rơndeh ôtô, phan sền gàr bơta lơngăp lơngai, rơcang sơndră mờ ồs sa, lơh kloh siồ siă lơh sơnơm, lơh niam đah bơdìh lòs, kă bro, adăt, broă drơng ala gah rơndeh par, năng lượng neh tus bal.

Đơs tàm dơ̆ pơrjum, Chủ tịch Quốc hội ồng Vương Đình Huệ đơs tờm, lơgar Việt Nam kơ̆p kờñ, mpồl bơtiàn Mpồl lơh sa kă bro lơgar Áo, anih kă bro lơh sa mờ măi mŏk geh jơnau đơs chồl pràn nàng gờñ kĭ Hiệp định dong kờl bơcri priă. Tŭ do, lơgar Áo geh 37 rơndăp broă mờ kờp jơh priă bơcri geh di pơgăp 150 tơlăk dolar Mỹ, tơrgùm uă ngan tàm ală gah lơh sa mờ măi mŏk lơh gơs phan ngui sa mờ khoa học công nghệ. Bè broă kă bro bal, lơgar Áo sùm là dùl tàm ală drà kă bro tăc phan mờ lơgar bơdìh kuơ màng ngan lơgar Việt Nam dê mờ tŭ do gam tàm mpồl 5 drà kă bro tăc phan mờ lơgar bơdìh dờng ngan lơgar Việt Nam dê tàm mpồl tam klăc châu Âu (EU). Chủ tịch Quốc hội ồng Vương Đình Huệ kung kơ̆p kờñ, mpồl lơh sa kă bro lơgar Áo kờñ bal nàng Chính phủ lơgar Áo dong kờl sơnơm vaccine, ală phan lơh sơnơm, dong kờl lơgar Việt Nam rơcang sơndră mờ kòp gơtờp.

Cau mblàng Ndong Brawl