VOV4.K’ho- Dờp jơnau jà bơh Chủ tịch Nghị viện châu Âu (EP) ồng David Sassoli, Chủ tịch Quốc hội Việt Nam ồng Vương Đình Huệ mờ mpồl kuang bàng ala măt kấp dờng màng Quốc hội Việt Nam neh tus ƀlàng rơndeh par Melsbroek, Brussels, lơgar Bỉ dê còp mờ lơh broă mờ Nghị viện châu Âu (EP), Mpồl tam klăc châu Âu (EU) bơh ngai 08 tus ngai 09/9.

Tàm dơ̆ lòt còp dơ̆ do tus lơgar Bỉ, ồng Vương Đình Huệ geh dơ̆ tìp măt cribơyai broă mờ Kuang ătbồ Mpồl duh broă châu Âu, cribơyai mờ Kuang ătbồ Nghị viện châu Âu, Kuang ătbồ Mpồl duh broă châu Âu, ala măt bơh ală nghị sĩ châu Âu dê tàm ală ủy ban kuơmàng bơh Nghị viện châu Âu dê, bè: Ủy ban bè kă bro dunia, do là Ủy ban geh gơnoar broă tờm ngan, dong sồr lơh broă lơh jăt hiệp định mờ ală mpồl nghị sĩ gĭt gơ̆p lơh bơyô bal mờ ASEAN kung bè Việt Nam. Kuơmàng, Quốc hội Việt Nam geh bal mờ Ủy ban kă bro dunia bơh Nghị viện châu Âu dê cribơyai, lơh gơs kơrnoat pal jăt ală nghị viện nàng dong lơh broă lơh jăt hiệp định.

Lài hơ̆, tàm dơ̆ lòt lơh broă tus bal Pơrjum ală Chủ tịch Quốc hội Dunia tàm lơgar Áo, ồng Vương Đình Huệ- Chủ tịch Quốc hội neh geh 3 jơnau cih đơs kuơmàng tàm ală dơ̆ pơrjum; mơkung tìp măt 2 gah mờ 13 nă kuang bàng đơng lam bồ kấp dờng màng bơh Quốc hội, Nghị viện ală lơgar dê...Kuơmàng là neh dờp bơta vaccine, phan bơna măy mok lơh sơnơm drơng ai broă lơh rơcăng sơndră kòp Covid-19 bơh ală mpồl lơh sa kă bro, mpồl bơtiàn mờ cau dùl nă să is tàm lơgar Áo dê.

Cau mblàng Lơ Mu K’Yến