Mpồl y, ƀák sỹ dong kờl is bơh hìu sơnơm dà lơgar Huế gam bơyai lơh broă lơh kham sơm kòp dong kờl kòn bơnus ai làng bol tàm ală xã tiah sar lơgar ngài tàm càr Lâm Đồng. Kờp dŭ rơ̆p geh pơgăp 2 rơbô nă làng bol geh dờp dong kờl bơh broă lơh do dê. Ngan là, bơh ngai 6 tus ngai 10 nhai 08, mpồl y, ƀák sỹ rơ̆p lam kham sơm kòp dong kờl kòn bơnus tàm ală xã Dà Chais mờ Dơng K’ Nơh, kơnhoàl Lạc Dương mờ Đông Thanh, Phúc Thọ, kơnhoàl Lâm Hà. Do là ală tiah sar lơgar ngài geh uă làng bol jơi bơtiàn dồ ết nă cau ơm kis. Làng bol rơ̆p geh kham mờ bơto pơlam pràn kơl dang, pà sơnơm ờ sa priă ai ală cau kòp dờng, kơnòm dềt, măt mờ sề kàng muh mat.

Tàm broă lơh kham sơm kòp tàm xã Dơng K’nơh kơnhoàl Lạc Dương ngai 7 nhai 08, mpồl neh kham kòp, pà sơnơm ờ sa priă ai mờr 500 nă làng bol in. Jàu 400 bơnah phan pà ală hìu bơnhă geh sră dong kờl dà lơgar, hìu bơnhă rƀah, hìu bơnhă kal ke tàm xã.