Tàm trồ tiah mrềt bơh nhai lồi nam dê, Trung tá Lâm Mạnh Tuyển, kwang bàng Pôs đồng ling sền gàr tiah nhàr lơgar Ia Chía, kơnhoàl Ia Grai, càr Gia Lai tus còp mò Puih Yơng, mờr 80 sơnam kis dồ nă să tàm ƀòn Beng, xã Ia Chía. Uă nam do tài bơh pràn kơl dang să jan gơmù uă ngan, mò Yơng ờ jai lòt rê, mờ kung uă nam do, Trung tá Tuyển bal mờ cau ling bal neh tus tơn tàm hìu kham kòp ai mò in. Tŭ dờp geh sơnơm bơh tê ală cau ling dê, mò Puih Yơng neh ngoh rơngăc ngan đơs: “Añ ưn ngài uă ngan tŭ sùm geh ală wa mpồl ling sền gàr tiah nhàr lơgar tus dong kờl, kham sơm kòp ai bol añ in. Să tờm añ gơwèt hìu bơnhă kal ke ngan, kis dồ nă să, tài bơh bơklau mờ oh kòn neh chơ̆t jơh lơm, uă tŭ kòp tê jê să ờ geh priă jền lòt kham mờ sơm kòp, ngai do ală wa neh tus kham mờ pà sơnơm nàng sơm kòp ai cau kra in”.

Kung là cau dờng sơnam gơtìp uă ngan bè pràn kơl dang să jan, ồng Ksor Bơng, 74 sơnam, ơm tàm ƀòn Bi, xã Ia O pà gĭt, Ling lơh sơnơm Pôs đồng ling sền gàr tiah nhàr lơgar Ia O, sùm là tiah mờ làng bol kơlôi sơn rờp ngan tŭ gơbàn kòp tê jê să. Kơnờm bơta dong kờl jơh nùs jơh tồr ngan bơh ală cau ling lơh sơnơm mpồl ling sền gàr tiah nhàr lơgar dê, làng bol tŭ do ờ hoan pal kơlôi sơnơng kòp jê băt bời halà lòt sơm kòp tàm tiah ngài, hoàc huơr ngan:“Dong ƀòn lơgar uă ngan, pôs đồng lơh dùl nơm hìu sơnơm tàm ƀòn tơn, tŭ kòp tê jê să làng bol lòt piam kòp tơn, sơnơm tơm ba pôs đồng dê pà gời jơh lơm. Làng bol tus dan sơnơm tŭ kòp tê jê să, kòp duh să, jê ndul pôs đồng rcang jơh lơm. Ai dilah kơn jơ̆ ir den pal jun tus hìu sơnơm dờng”.

Uă nam do, mpồl ling lơh sơnơm Ling sền gàr tiah nhàr lơgar lơh jat ndrờm bal mờ kơnòl broă sền gàr pràn kơl dang să jan ai cau ling, kham sơm kòp ờ sa priă ai làng bol tàm tiah nhàr lơgar mờ làng bol lơgar bơyô Campuchia in. Bơdìh mờ kham kòp, sơm kòp, ală y, ƀák sĩ gam bơto pơlam ai làng bol in broă lơh rcang lài pleh mờ ală bơta kòp sùm gơtìp; lơh jat broă lơh kis sàng goh, sa sin, hùc duh, bĭc tàm kơmung... Bơh hơ̆ pơgồp bơnah mờ hìu sơnơm ƀòn lơgar tơnguh uă bơta gĭt wă bơh làng bol dê bè broă lơh sơnơm, rcang lài pleh kòp, pơs wàs sàng goh tiah ơm kis mờ gĭt mờ ală broă drơng lơh sơnơm. Trung tá Trần Anh Tuấn- ling lơh sơnơm Pôs đồng ling sền gàr tiah nhàr lơgar Ia O, kơnhoàl Ia Grai, pà gĭt:“Broă lơh kham kòp bơh ling lơh sơnơm ling klàng làng bol pơgồp bal là geh lơh ờ sa priă jơh lơm, pah nhai, pah qúy ndrờm mù tus tàm ƀòn pà sơnơm mờ kham sơm kòp ai làng bol in, bơh hơ̆ lơh geh bơta tàm bơrkoăt bal đah Pôs đồng ling sền gàr tiah nhàr lơgar mờ làng bol, lơh geh nùs nhơm pin dờn kờñ gơboh bơh làng bol dê gơwèt mờ mpồl ling sền gàr tiah nhàr lơgar. Añ kung pơpgồp bal mờ hìu sơnơm xã halà Kông ty 74, Kông ty 75 nàng geh broă lơh kham, pà sơnơm ờ sa priă ai làng bol in den bol añ kung pơgồp bal mờ tus bal nàng kham sơm kòp ai làng bol in sơl”.

Bơh nam 2023 tus tŭ do, bal mờ kham sơm kòp tàm mpồl ling, ală ling lơh sơnơm mpồl ling sền gàr tiah nhàr lơgar càr Gia Lai neh lam lơh uă dơ̆ mù tàm thôn, ƀòn kham kòp, pà sơnơm ờ sa priă ai mờr 2 rơbô nă cau in mờ pà pơgăp 600 tơlak đong ai ală hìu bơnhă kal ke tàm tiah nhàr lơgar. Ồng Ksor Tuông, Phó Củ tịc Anih duh broă Làng bol xã Ia O, kơnhoàl Ia Grai pà gĭt, ală broă lơh bơh ling lơh sơnơm mpồl ling sền gàr tiah nhàr lơgar dê pơgồp bơnah tơnguh bơta gĭt wă sền gàr sàng goh tiah ơm kis, rcang lài kơryan geh cồng nha ală bơta kòp:“Ală cau lơh sơnơm bơh mpồl ling sền gàr tiah nhàr lơgar dê jơh nùs ngan tàm broă mblàng yal làng bol in pơs wàs sàng goh tiah ơm kis. Tus tơl hìu bơnhă làng bol nàng còp, kham kòp ai cau kra, kơnòm dềt in. Bơh sền sơ wì den broă sền gàr is pràn kơl dang să jan mờ pơs wàs sàng goh tiah ơm kis làng bol dê lơh jat niam ngan, khà kòp mprơm gơlik mhàm gơmù uă, ală bơta kòp ndai geh sŏk sền ờ lời gơlik kòp bơtờp uă tàm ù tiah do dê. Hơ̆ là dùl bơnah kơnờm bơta dong lờl sền gàr pràn kơl dang să jan ai làng bol in bơh ală kwang bàng, cau ling tàm ù tiah do dê”.

Ală broă lơh geh kwơ, ngan ngồn bơh ală cau ling lơh sơnơm gơwèt Mpồl ling sền gàr tiah nhàr lơgar càr Gia Lai dê neh bal mờ ală kấp ủy, gơnoar atbồ ală tiah, hìu sơnơm ƀòn lơgar lơh niam broă lơh sền gàr pràn kơl dang să jan ai làng bol in. Pơgồp bơnah bơt bơtàu nùs nhơm tam klăc bal ling klàng làng bol tiah nhàr lơgar, sền gàr kơ̆ kơl jăp tiah nhàr lơgar bơh Dà lơgar dê.