Tàm dơ̆ tìp mat, ală cau ala mat neh sền bal ală gơl lơma ală jơnau bè gùng lòt 80 nam bơt bơtàu, tam lơh, ntào dờng bơh Mpồl ling klàng làng bol Việt Nam mờ mpồl ling phàu crong càr Dăk Lăk kung bè Ling tiah 5 dê.

Mò H’Yim K’Đok, Phó Củ tịc Anih duh broă Làng bol càr Dăk Lăk pơyoa jơnau lùp còp pràn kơl dang să jan, tơngŏ nùs nhơm gĭt ưn ngài uă ngan tềng đăp ală tă pơgồp dờng màng ngan bơh ală kwang bàng dê tàm dơ̆ tam lơh, bơt bơtàu mờ sền gàr Dà lơgar. Phó Củ tịc Anih duh broă Làng bol càr Dăk Lăk yal bè bơta bơtàu tơnguh lơh sa- mpồl bơtiàn càr Dăk Lăk nam 2024 dê. Mò H’Yim K’Đok kơ̆p kờñ ală kwang bàng mpồl ling klàng kấp dờng neh jơh sơnam lơh broă, ơm rlô lơh broă pơn jat tai tă pơgồp bồ tơngoh, jơnau bơceh lơh, ai uă tai mờng chài lơh broă nàng bơt bơtàu kơ̆ kơl jăp rài jơh gùt làng bol sền gàr Dà lơgar, nùs nhơm rcang lài lơngăp lơngai làng bol mờ mpồl ling phàu crong càr dê ngai sơlơ pràn kơl dang, kơ̆ kơl jăp.