Kơnờm geh Rơndăp broă lơh sồ 8 mờ bi Châu Thị Ngọc Điệp, ơm tàm ƀòn Đại Nghĩa Thắng, xã Đại Tâm geh tus bal uă broă lơh gah mblàng yal jơnau tàm tiah do dê. Bơh hơ̆, bi mblàng yal ai ală hìu bơnhă gùt dar in gĭt wă mờ yờ tơnguh uă bơta gĭt wă tàm broă lơh sền, dong kờl cau ùr mờ kơnòm dềt. Bi Châu Thị Ngọc Điệp, đơs: “Añ tus bal mờ Rơndăp broă lơh sồ 8 den kung lòt mblàng yal làng bol oh mi in ờ gŏ di lơh pờng oh kòn bè lài do tai, sền gàr cau ùr mờ kơnòm dềt tàm tiah do dê”.

Rơndăp broă lơh sồ 8 geh lam lơh tàm 3 ƀòn kal ke uă ngan bơh kơnhoàl Mỹ Xuyên dê. Hơ̆ là ƀòn Đại Nghĩa Thắng, xã Đại Tâm; ƀòn Sóc Bưng, xã Thạnh Phú mờ ƀòn Phú Giao, xã Thạnh Quới mờ uă broă lơh geh ngan  neh mờ gam geh lơh. Bi Dương Thị Mỹ Nhiên,  atbồ mpồl Cau ùr ƀòn Phú Giao, xã Thạnh Quới, kơnhoàl  Mỹ Xuyên, càr Sóc Trăng đơs: “Tàm tơngai tus, Mpồl cau ùr ƀòn Phú Giao, xã Thạnh Quới rơ̆p pơgồp bal niam mờ mpồl kấp hơđang mờ ală kấp, ală gah broă geh gơnoar, lơh jat niam ală kơnòl broă bơh Rơndăp broă lơh sồ 8 dê. Do là dùl tàm ală broă dong kờl dờng, kwơ màng ngan geh gơrềng tus cau ùr mờ kơnòm dềt, lơh tus jơnau kờñ ring bal ùr klau mờ tơrgùm bơsong geh cồng nha bàr pe broă jal mhar bơh cau ùr mờ kơnòm dềt tàm tiah làng bol jơi bơtiàn dồ ết nă cau dê”.

Tơngai pa do, Mpồl Tam klăc cau ùr kơnhoàl Mỹ Xuyên tơrgùm tàm 3 tơngume tờm. Hơ̆ là mblàng yal, hòi jà tơn jơh bơta mờng sơnơng mờ bơta mờng lơh broă, pơgồp bơnah tơn jơh jơnau ờ rờm bal ùr klau mờ tàm cah is cau ùr mờ cau klau tàm hìu bơnhă mờ mpồl bơtiàn dê, ală bơhiàn niam chài yau ờ niam bơr ngơl gơla mờ bàr pe broă mpồl bơtiàn jal mhar ai cau ùr mờ kơnòm dềt in; Bơt bơtàu mờ rề ơnàng ală broă lơh tam gơl bơta mờng sơnơng mờ bơta mờng lơh broă, tơnguh uă gơnoar lơh sa ai cau ùr in; Tơnguh bơta ring bal ùr klau mờ bơsong ală broă jal mhar cau ùr mờ kơnòm dềt in; gàr niam jơnau đơs mờ bơta tus bal ngan ngồn bơh cau ùr mờ kơnòm dềt dê tàm ală broă lơh bơtàu tơnguh lơh sa mpồl bơtiàn bơh mpồl bơtiàn dê, jat sền mờ hơ jơnau lùp, dong kờl cau ùr tus bal lơh broă tàm ală anih lơh broă cíñ trị. Mò Trần Hồng Ni, Củ tịc Mpồl Tam klăc cau ùr kơnhoàl Mỹ Xuyên, càr Sóc Trăng pà gĭt: “Nàng lơh jat niam Rơndăp broă lơh sồ 8, Mpồl Tam klăc cau ùr kơnhoàl Mỹ Xuyên sơlơ tơnguh tai broă lơh mblàng yal jơnau, lơh ală broă lơh di pal mờ bơta geh ngan bơh tiah do dê mờ bơsong bơta ờ ring bal ùr klau tàm uă gah gơwèt mờ cau ùr mờ kơnòm ùr dềt tàm tiah làng bol jơi bơtiàn dồ ết nă cau, sang tĕ bơta ờ rờm bal ùr klau, tam cah is cau ùr mờ cau klau, bơhiàn yau bơr ngơl gơla, bơta mờng kwèng yau bơr ngơl gơla, pơgồp bơnah tàm bơta bơtàu tơnguh bal bơh tiah do dê”.

Tơnơ̆ tơngai lam lơh Rơndăp broă lơh sồ 8, bơta ờ ring bal ùr klau bè gơnoar kwơ bơsram, lơh broă, sền gròi pràn kơl dang să jan bơh cau ùr dê tàm càr Sóc Trăng neh geh tam gơl; ngan là cau ùr tàm tiah sar lơgar ngài, tiah làng bol jơi bơtiàn dồ ết nă cau. Gơnoar broă, bơngă pin dờn bơh cau ùr dê ngai sơlơ geh đơs nền tàm ală gah broă tàm rài kis mpồl bơtiàn mờ hìu bơnhă dê. Bơta tam cah is ùr klau geh tam gơl niam, cau klau mờ cau ùr ndrờm geh dong kờl ngai sơlơ niam rlau tai. Jat khà kờp kờp tus lồi nam lài, jơh gùt càr geh 109 xã, sơnah ƀòn, ƀòn drà dềt geh broă lơh rcang lài kơryan lơh hìu hìu bơnhă mờ mờr 180 mpồl, mờr 650 mpồl cau rcang lài kơryan lơh pờng hìu bơnhă, rlau 800 tiah pin dờn tàm mpồl bơtiàn, mờr 850  gùng che điện thọai hòi mhar.