Tàm rơndăp broă lơh bơh Ƀộ Kwang àng dê, kwang àng kơnhoàl Ea H’leo geh jào lơh 86 nơm hìu bơta nđàc. Jăt Thượng tá Phùng Minh Trí, Kwang atbồ Kwang àng kơnhoàl Ea H’leo yal, tơnơ̆ mờ tŭ dờp geh jơnau sồr bơh gơnoar atbồ, nhai 03 nam 2024, mpồl kwang àng tàm kơnhoàl do neh rơcang pơlam Anih duh broă Làng bol kơnhoàl Ea H’leo in lơh geh Mpồl sồr lơh jăt rơndăp broă; pơgồp bal mờ ală cơl dŭ lơh broă, gah lơh broă gơrềng bal, Anih duh broă Làng bol ală xã, ƀòn drà dềt sền wơl nàng rơwah ală cau geh dờp lơh hìu. Tŭ mŭt lơh hìu, kwang àng kơnhoàl ai mpồl tus lơh bal, tàm hơ̆ uă ngan là đoàn viên ơruh pơnu tàm mpồl kwang àng tus dong kờl ngai lơh hìu làng bol in…

Mờ ală broă lơh ngan tơl bơta, mìng tơnơ̆ mờ mờr 02 nhai, kơnhoàl Ea H’leo neh lơh gơs 86 nơm hìu, jào ală hìu nhă in, sơrlèt mờ tơngai geh ai lơh 04 nhai. Thượng tá Phùng Minh Trí đơs:  “Tơnơ̆ tơngai mờr 02 nhai lơh, hìu dơ̆ 86 (hơ̆ là hìu dŭt ndơl tàm rơndăp broă lơh hìu tàm kơnhoàl dê) neh lơh gơs. Do mùl màl là broă lơh kwơ màng ngan, mùl màl mờ niam bơnĕ ngan, gàr niam rài kis broă lơh sa mpồl bơtiàn tàm kơnhoàl dê, dong kờl làng bol geh hìu ơm kơ̆ kơl jăp tàm rài kis, iang nùs lơh broă sa”.

Tàm kơnhoàl Cư̆ Kuiñ, broă lơh jăt rơndăp broă lơh hìu bơta nđàc kung geh lơh mhar sơl bŭ lah gơtìp uă ngan kal ke. Jăt Thượng tá Nguyễn Cao Quyết, Kwang atbồ Kwang àng kơnhoàl do yal, geh uă hìu cau geh dờp lơh hìu in, mơya ù nàng lơh hìu ờ hềt geh tam cah bă ù, ờ hềt tam gơl broă ngui ù, ờ geh sră dờp gơnoar ngui ù. Geh ờ uă hìu ờ prăp sră dờp hìu rơƀah, hìu pa lik klàs rơƀah. Bal mờ hơ̆ là geh bơta ală mpồl dong kờl ờ jào priă di tơngai. Nàng bơsong ală bơta kal ke, gơkòl do, kwang àng kơnhoàl pơgồp bal mờ ală cơl dŭ lơh broă, gah lơh broă tờm, Anih duh broă Làng bol ală xã neh lơh ngan lơh ală sră nggal nàng dong kờl làng bol; lam sồr ală mpồl lơh sa kă bro tàm do càn lài ing phan nàng lơh hìu. Mờ broă dong kờl mhar bơh mpồl lơh broă geh gơnoar, ală bơta kal ke, gơkòl mhar geh bơsong.

Thượng tá Nguyễn Cao Quyết pà git: “Bơdìh mờ priă bơh Ƀộ kwang àng bal mờ càr dong kờl, kwang àng kơnhoàl kung neh hòi jà tai ală priă dong kờl ndai bơh ală cau geh nùs nhơm niam nàng dong kờl làng bol. Cau lơh hìu den hòi jà ală mpồl, kwang àng ală xã tus bal lơh hìu làng bol in. Jơnau kờñ lơh hìu là kơl jăp, kơ̆, niam, ngui geh cồng nha”.

Càr Dăk Lăk là càr tiah kơh bơnơm geh di pơgăp 2 tơlăk nă làng bol, khà hìu rơƀah di pơgăp 8%. Pơgồp bal tàm broă tơn jơh hìu sèt, hìu ñhăt dà mìu, Ƀộ Kwang àng lơh rơndăp broă lơh 1 rơbô 200 nơm hìu bơta nđàc nàng jào ală hìu rơƀah, kal ke, làng bol jơi bơtiàn ờ gal cau, hìu nhă geh sră dong kờl bơh mpồl bơtiàn tàm càr Dăk Lăk mờ jào Kwang àng càr đơng lam lơh. Mờ nùs nhơm geh kơnòl bal mờ broă lơh ngan bơh Kwang àng càr Dăk Lăk bal mờ gơnoar atbồ ƀòn lơgar, 1 rơbô 200 nơm hìu neh geh lơh gơs tàm lồi nhai 07 nam 2024, sơrlèt mờ tơngai geh ai 03 nhai, cèng geh nùs nhơm chờ hờp ai ală hìu in geh dờp hìu ơm. Bi Y Thon Niê, kòn cau Rơđê, kis tàm ƀòn Ma Sút, xã Krông Jing, kơnhoàl Mdrăk yal bè nùs nhơm chờ hờp tŭ geh mŭt ơm tàm hìu pa: “Hìu mpàn lài do ơnàng 20 thơ̆k, tŭ mìu den ñhăt dà, tŭ trồ tơngai den gơthul, duh. Geh Ƀộ Kwang àng pà hìu, añ chờ hờp ngan, tŭ do ờ ngòt ñhăt dà tŭ trồ mìu, ờ ngòt duh tŭ trồ tơngai tai. Ùr bơklao añ iang nùs ơm kis, tŭ do lơh ngan lòt lơh broă nàng geh priă ròng kòn lòt bơsram. Ưn ngài Ƀộ Kwang àng mờ ală gah, mpồl lơh broă”.

Jăt Đại tướng ồng Lương Tam Quang, Ƀộ trưởng Ƀộ Kwang àng đơs, 1 rơbô 200 nơm hìu lơh nàng pà hìu gơtìp kal ke tàm càr Dăk Lăk in geh lơh sơrlèt mờ tơngai geh ai pà gŏ nùs nhơm sơbăc mhar, geh kơnòl bơh mpồl kwang àng, ală kấp, gah lơh broă tàm càr Dăk Lăk; broă lơh broă bal bơh uă mpồl lơh sa kă bro tàm broă lơh jăt kơnòl rài kis broă lơh broă sa mpồl bơtiàn dê. Ƀộ trưởng Ƀộ Kwang àng đơs nền, Ƀộ Kwang àng pơn jăt tai lam lài tàm broă lơh jăt broă lơh “Gùt lơgar tus bal tơn jơh hìu sèt, hìu ñhăt dà mìu tàm gùt lơgar” nàng ờ geh cau lơi gơtìp sơrbì is hờ tơnơ̆: “Pơn jăt tai lơh jăt jơnau sồr bơh ồng Tổng Ƀí thư Tô Lâm dê, Ƀộ Kwang àng pơn jăt tai lam lài lơh jăt broă pơrlòng lơh: “Gùt lơgar tus bal tơn jơh hìu sèt, hìu ñhăt dà mìu tàm gùt lơgar”. Bơh tŭ do tus nam 2025, pơgồp bal mùl màl tàm jơnau kờñ tơn jơh 153 rơbô nơm hìu sèt, hìu ñhăt dà mìu tàm gùt lơgar, tàm hơ̆ uă ngan là tàm ală tiah ngài, tàm ală tiah gơtìp kal ke bè lơngăp lơngai mpồl bơtiàn, tàm hơ̆ geh tiah Tây Nguyên”.