Ală ngai nggùl nhai 10, tàm tiah pơlam tàp Gah đơng lam mpồl Ling klàng càr Dăk Lăk tàm xã Krông Na, kơnhoàl Buôn Đôn, geh ală dơ̆ mìu dờng jŏ jòng. Hạ sỹ Ngô Văn Trọng bal mờ ală cau ling bal mpồl dềt ià ală phan tam lơh kơn jơ̆ Mpồl ling dờng ling tam lơh hơđang ù gờl 2 ngui rơndeh chŏ ù chŏ ù lŭ bơ̆t àr kơryan dà lìu tàm tiah pơlam tàp, lơh kơnhăp wơl jrong ală pang cuh phàu gơ in kơ̆. Lơh broă tàm trồ mìu tàm uă jiơ, să jan sùh jơh. Hạ sỹ Ngô Văn Trọng pà gĭt, bal mờ mpồl ling bal sùm pơlam tàp, tơnguh uă bơta khin cha cíñ trị, pơn jat tai pơlam tàp nàng tơnguh uă bơta chài, broă tam lơh mờ bơta pràn crăp rcang tam lơh. Hạ sỹ Ngô Văn Trọng, đơs: “Mpồl ling dờng gam pơlam tàp ală jơnau tam lơh mpồl dềt tam lơh, trung đội rcang gàr lài mờ mpồl ling dờng sò tơm tam lơh thàm pà ai wơl pôs đồng tàm bơta lơh pơn yơu. Mpồl ling dờng pơlam tàp pah ngai, mờ nùs nhơm tam lơh uă ngan, crăp rcang tam lơh sền gàr Dà lơgar”.

Mpồl ling dờng ling tam lơh hơđang ù gờl 2 geh tơnggơs ngai 01/01/1991, bơh chờm là Mpồl ling dờng Ling tam lơh hơđang ù gờl 2, Mpồl ling dềt 697 gơwèt Gah đơng lam mpồl Ling klàng càr Dăk Lăk dê. Là dùl tàm 2 mpồl ling dờng ling tam lơh hơđang ù gờl bơh Gah đơng lam mpồl Ling klàng càr dê lơh pôs đồng tàm tiah nhàr lơgar, Mpồl ling dờng 2 là mpồl ling tam lơh hơđơng ù gờl tờm sền gàr tiah nhàr lơgar kơnhoàl Ea Súp. Tàm ală bơta trồ tiah kal ke mìu dờng, dà kŏ dà cò sùm tàm kàl mìu, trồ prang dờng soăt dà tàm kàl prang tàm tiah nhàr lơgar dê, mpồl ling dờng sùm gàr tơl mpồl ling, rơndeh rơndồ măi mok crăp rcang lài tam lơh uă. Tàm ală nam 2020 mờ 2023, mpồl ling dờng lơh geh sră jờng rơ mpồl ling Lơh tus geh, uă nam sùm là mpồl ling dờng sàng goh, pràn kơl dang kơ̆ kơl jăp tơl làm. Tŭ do, kwang bàng, cau ling mpồl ling dờng gam tơrgùm pơlam tàp, lơh ngan tàm pơrlòng, lơh sir kơnòl broă, lơh geh cồng nha wèt tus gờm chờ tơngkah kir sơnrai 80 nam Ngai tơnggơs Mpồl Ling klàng làng bol Việt Nam (22/12). Trung uý Tô Viết Sỹ- Chính trị viên Mpồl ling dờng, đơs: “Bol añ sền sơ wì cuh gar phàu ngan mờ tơngume mpồl ling dờng ling tam lơh hơđang ù gờl hòi jà tam lơh, bơh hơ̆, lơh ai kwang bàng, cau ling in nùs nhơm geh kơnòl kung bè bơta pràn jak tàm tŭ lơh kơnòl broă tŭ geh bơta digơlan gơlik geh”.

Geh tơnggơs tàm ngai 06/01/1995, Mpồl ling dờng ling tam lơh hơđang ù gờl 5 geh kơnòl broă pơlam tàp, ơm gak, crăp rcang tam lơh mờ crăp rcang lơh kơnòl broă A2 sền gàr kơnhoàl Buôn Đôn. Pah nam mpồl ling lam pơlam tàp tơnguh uă ai cau ling pa lòt ling tàm ù tiah càr in; lơh niam broă lơh hòi jà làng bol; bơtàu tơnguh lơh broă sa, bơtàu tơnguh rài kis ai mpồl ling mờ lơh jat bàr pe kơnòl broă ndai tŭ geh kơrnoăt bơh kấp hơđang dê. Thượng uý Nguyễn Thành Phước, Chíñ trị viên Mpồl ling dờng ling tam lơh hơđang ù gờl 5, pà gĭt: "Bơdìh mờ kơnòl broă crăp rcang tam lơh, Mpồl ling dờng ling tam lơh hơđang ù gờl 5 gam geh kơnòl broă jòi dong kờl rềs àr; dong làng bol tàm tiah lơh pôs đồng lơh jat niam broă mblàng yal, yal tơngĭt adat boh lam. Pơgồp bal mờ gơnoar atbồ ală tiah lơh hìu ơm, hìu tam klăc dờng, dong làng bol tơnhào phan tam lơyah ngai, lơh mờ toah wàs sàng goh gùng lòt, rbòng dà, bơtơ̆t rbòng dà; lam lơh dong kờl ală broă lơh lơh sa ròng phan, tam phan pa dong làng bol bơtàu tơnguh lơh sa niam rlau tai”.

Buôn Đôn mờ Ea Súp là 2 kơnhoàl tiah nhàr lơgar bơh càr Dăk Lăk dê. Jơh tiah do geh rlau 11 rơbô hìu bơnhă, mờ rlau 25 rơbô nă cau, 29 jơi bơtiàn ơm kis bal. Do là tiah geh trồ tiah kal ke, ù tiah ro kơnrañ, sùm gơlik geh trồ tiah lơh aniai. Rài kis làng bol dê gam kal ke, bòl gar. Kra ƀòn Y Thưng Kđoh, ơm tàm ƀòn Trí, xã Krông Na, kơnhoàl Buôn Đôn pà gĭt, ală nam pa do, Mpồl ling dờng ling tam lơh hơđang ù gờl 5 jơh nùs ngan dong kờl làng bol tàm broă lơh gàr niam rài kis mpồl bơtiàn, jòi dong kờl rềs àr pah tŭ trồ tiah lơh aniai gơlik geh. Kra ƀòn Y Thưng Kđoh đơs: “Trồ tiah lơh aniai, dà kŏ dà cò halà mìu càl rơbŭt dờng tus là Mpồl ling dờng 5 ai kwang bàng, cau ling tus dong kờl làng bol uă ngan, bè: toès kòi, tìm wơl rkàng hìu, ntrờn làng bol mờ phan bơna rcang lài pleh mờ dà kŏ dà cò. Ală cau ling gam pà kơnrồ, be, tờm sơntìl, dong kờl tam kơphê, tiêu mờ tờm chi sa plai. Mpồl ling dong làng bol uă ngan. Làng bol kơnờm tàm mpồl ling, mpồl ling dong kờl làng bol, nùs nhơm ling klàng làng bol ngai sơlơ rềp mềr ngan”.

Lòt gan rlau 1 bơnah 3 rài bơt bơtàu, tam lơh, ntào dờng, ală Mpồl ling dờng ling tam lơh hơđang ù gờl gơwèt Gah đơng lam Mpồl Ling klàng càr Dăk Lăk là mpồl ling tờm sền gàr kơ̆ kơl jăp lơngăp lơngai tiah nhàr lơgar bơh Dà lơgar dê, bơt bơtàu kơ̆ kơl jăp nùs nhơm rcang lài tàm làng bol, ngan ngồn là ală Mpồl ling dờng ling tam lơh hơđang ù gờl pràn kơl dang tàm tiah nhàr lơgar càr Dăk Lăk dê.