Tus tŭ do, Cơldŭ lơh broă Ƀộ Kwang àng neh dờp mờr 90 tơmàn đong dong kờl broă lơh bơsong jơnau gơ lời wơl tơnơ̆ trồ tiah lơh aniai. Lam lơh “Broă lơh Quang Trung” bơh Thủ tướng Cíñ phủ lam lơh, Ƀộ Kwang àng geh jàu đơng lam lơh pa 429 nơm hìu dong làng bol tàm 8 càr tiah tàm gùl lơgar mờ Tây Nguyên. Tus tŭ do, neh geh 19 nơm hìu lơh gơs, sơrlèt mhar rlau mờ tŭ tơngai ai tơlik; uă broă lơh ndai lơh geh khà broă rlau 70%. Jơh ală khà hìu kờp dŭ jàu lài mờ ngai 15/01/2026, pơnđơl lơh gơs gờñ rlau bơh 10 tus 15 ngai tàm bàr pe tiah.

Ala mat đơng lam Kwang àng ală sàh, sơnah ƀòn neh tam pà bal ală mờng chài ngan ngồn bè jơnau đơs “4 tơn tàm dùl anih” tàm broă drơng mờ trồ tiah lơh aniai mờ broă lơh hòi jà làng bol là tờm ngan nàng gàr kơ̆ lơngap lơngai rơndap tap sèng tàm ală tiah tờm tơtìp dà tih dà lìu; broă lơh yal jơnau tơnggit bè mìu dà tih dà mìu, bơsong jơnau gơ lời wơl tơnơ̆ trồ tiah lơh aniai.

Thiếu tướng ồng Nguyễn Hữu Phước, Kwang Lam bồ Kwang àng càr Khánh Hòa pà git, dơ̆ mìu dà tih dà lìu pa do tàm càr Khánh Hòa neh lơh gơbam tàm dà tàm uă tiah, rlau 100 rbô hìu bơnhă làng bol gơtìp gơ rềng, hoàc huơr bè priă jền kờp dŭ rlau 5 rbô tơmàn đong. Kwang àng càr neh hòi jà 6 rbô 500 dơ̆ kwang bàng, cau ling kwang àng tus bal dong kờl rềs àr, ntrờn làng bol, bơsong jơnau gơ lời wơl tơnơ̆ trồ tiah lơh aniai. 800 nơm phan bơna ơhò plung, rơndeh rơndồ geh ai, dong kờl geh mờr 20 rbô nă cau tus tiah niam ờdo ờdă. Tơnơ̆ mìu dà tih dà lìu, Kwang àng càr kung neh sơn đờm lơh pa 24 nơm hìu tàm tơngume “Broă lơh Quang Trung: “Bol hi neh jàu kơnòl, ai uă ngan rlau jơh mpồl lơh broă, măi mok, phan bơna lơh kơnòl broă. Jơnau đơs là bol hi geh phan lơi tàm tê den ndrờm ngui nàng dong kờl làng bol. Kwang bàng, cau ling kwang àng kâp sàh, mpồl sền gàr lơngăp lơngai rơndap tap sèng ƀòn lơgar neh dồ ròt lam lơh bơsong jơnau gơ lời wơl tơnơ̆ mìu dà tih dà lìu tàm càr. Dà gơ hoài soat tus tềng lơi den pơs wàs kloh niam tus tềng hơ̆”.

Thiếu tướng ồng Nguyễn Hồng Nguyên, Phó Lam bồ mờ kong kơnòl Cơldŭ lơh broă Ƀộ Kwang àng đơs niam nùs nhơm geh kơnòl, bơta crăp rơcang mờ cồng nha lơh geh tàm broă lơh mblàng yal jơnau bè rơcang gàr làng bol mờ “Broă lơh Quang Trung” bơh ală mpồl kwang àng, ală sàh, sơnah ƀòn dê; mờ kung đơs sùm, do là kơnòl geh Ƀộ Kwang àng sền gròi ngan, tơrgùm sồr lơh sùm.

Thiếu tướng ồng Nguyễn Hồng Nguyên sồr ală mpồl lơh broă, kwang àng ală sàh, sơnah ƀòn pơn jat tai lơh jat nền nòn bơta đơng lam, sồr lơh bơh Đảng, dà lơgar dê. Mờ kung pơn jat tai lơh pràn broă lơh yal tơnggit jơnau, mblàng yal, ngan là tàm internet, lơh gơlik bơta tam gơl pràn bè git wă, broă lơh tàm đơng lam, sồr lam lơh kơnòl broă, bơt bơtàu mpồl kwang àng làng bol kung bè broă lơh rơcang gàr làng bol, gàr niam lơngăp lơngai rài kis mpồl bơtiàn, bơsong jơnau gơ lời wơl tơnơ̆ trồ tiah lơh aniai. Thiếu tướng ồng Nguyễn Hồng Nguyên đơs: “Nam 2026. Mpồl kwang àng làng bol geh srơh tàm pơrlòng 3 ngan rlau jơh, hơ̆ là duh rơngòt adat boh lam ngan rlau jơh, dòn song ngan rlau jơh mờ rềp làng bol ngan rlau jơh. Tài bè hơ̆ den tàng kơnòl yal tơnggit jơnau cíñ trị, mblàng yal bè rùp să kwang àng làng bol là broă lơh uă gah, bơ tòm tơrgùm bal”.