Tơnơ̆ 18 ngai mờ broă dong kờl mhar bơh ală mpồl ling, tus tŭ do hìu tàm “broă lơh Quang Trung” neh lơh gơs mờ jào mò Nguyễn Thị Sáng (thôn Phú Thành, sơnah ƀòn Hàm Thắng) in. Tàm dơ̆ bơyai lơh mŭt ngui, ala măt Mpồl bơyai lơh neh jào pang sră mŭt ngui hìu ơm ai mò Sáng in, bal mờ hơ̆, geh uă mpồl lơh broă pà tai phan ngui tàm hìu.

Càr Lâm Đồng là dùl tàm ală càr gơrềng uă ngan bơh mìu dờng ni sơna, neh lơh aniai bè phan bơna, uă hìu nhă gơtìp roh hìu đam, rài kis gơtìp bơrlŭ. Tềng đăp mờ broă sồr lơh bơh Ƀộ trưởng Ƀộ Kwang àng dê, mpồl ling kwang àng neh mhar ai cau tus, pơgồp ba mờ gơnoar atbồ ƀòn lơgar nàng dong kờl làng bol bơsong bơta gơlời wơl. Tàm tơngai tus, kwang àng càr rơ̆p pơn jăt tai tơrgùm hòi jà mpồl nàng lơh gơs lài mờ tơngai geh ai ală hìu tàm càr, lơh ngan lơh gơs lài mờ ngai 15 nhai 1.