Mùl màl tàm sàh Ea Na, càr Dăk Lăk, tiah geh 70 hìu bơnhă làng bol gam lơh bal lơh sa geh cồng nha ngan tàm ală mpồl lơh gơlik phan gah lơh kơphe.

Tàm anih lơh phan prap bềng ƀàu kơphe, ồng Y Jai Hđơk, dùl tàm ală hìu bơnhă làng bol lơh broă sa ƀòn Kla, sàh Ea Na, càr Dăk Lăk mut tàm mpồl lơh gơlik phan kơphe pà git, do là kàl pik tơnhàu kơphe dơ̆ 2 kờp bơh tŭ làng bol lơh bal mờ Kông ty pơgồp bal Êđê kơphe, tàm bơta dong kờl bơh dà lơgar dê. Mut tàm mpồl lơh bal do, làng bol geh bơto pơlam bơta chài măi mok, geh tac phơng sih, sơnơm sền gàr phan tam mờ geh mpồl lơh sa kă bro lam bồ mpồl lơh gơlik phan blơi jơh phan lơh gơs mờ giă blơi jơnhua rlau mờ giă drà kă bro dê. Bơta lơh ồng Y Jai chờ hờp ngan rlau jơh là cồng nha nam do neh uă rlau 1 dơ̆ mờ nggùl pơndrờm mờ nam lài: “Kơphe nam do tơnhàu uă rlau 2/3 pơndrờm mờ nam lài. Geh lơh bal nàng sơngka sền gàr kơphe bè do den gơ wèt mờ làng bol là dùl bơta niam rlau. Dilah dà lơgar lơh gơlik bơta niam uă rlau tai den rơp kơnhăp kơ̆ rlau ai làng bol tam kơphe in”.

Broă lơh jơnau kờñ dà lơgar tơrmù rƀah kơnhăp kơ̆ tơngai bơh nam 2021 tus nam 2025, dùl gùng dà broă lơh dờng mờ Quôk hội ai tơlik, geh lam lơh ngan ngồn dồ bă loh làng ngan tàm càr Dăk Lăk. Mìng is gơ wèt mờ rơndap broă sồ 3, dùl tàm 9 rơndap broă lơh bơh broă lơh dê, 5 nam do neh ai priă bơcri rlau 223 tơmàn đong, dong kờl mờr 6 rbô 700 broă lơh sa, lơh gơlik li la broă lơh sa. Tàm hơ̆, ală broă lơh lơh bal lơh sa jat ală mpồl lơh gơlik phan, cèng wơl ală tam gơl niam ngan rlau jơh. Ờ mìng dong làng bol tơnguh bơta chài lơh sa mờ priă lơh geh gơguh uă, broă lơh do gam dong mpồl lơh sa kă bro geh tiah tam phan pin dờn, tàm pơdar lơh gơlik mờ bơt bơtàu măt kă bro.

Is ồn gơ wèt mờ Y Pôt Niê, Kwang Lam bồ Kông ty pơgồp bal Êđê kơphe, ală mpồl lơh gơlik kơphe mờ dà lơgar lam lơh tàm ƀòn gam lơh gơlik tai ală bơta kuơ nùs nhơm: “Bơh lài tus tŭ do ờ hềt geh cau Rơđê lơi git lơh bal. Den tàng bơh sơn rờp làng bol kung ờ pin dờn añ. Bulah bè hơ̆, tơnơ̆ tŭ lơh bal mờ dà lơgar, geh dà lơgar dong kờl dùl bơnah mờ añ dong kờl dùl bơnah den làng bol neh geh bơta pơgồp bal, tam klac bal mờ pin dờn uă rlau. Añ gŏ ală mpồl lơh gơlik phan lơh bal tàm do ờ mìng là priă jền lơh geh phan bơna dê mờ tàm do gam geh bơta kuơ nùs nhơm bơh kòn bơnus dê tai”.

Dăk Lăk tơnơ̆ tŭ tơmut bal neh rề ơnàng, gơ gơs là ù tiah kơh bơnơm dờng ơning ơnàng gơ pơn jat sùm bơh tiah nhàr lơgar đah mat tơngai mut tus dà lềng tiah đah mat tơngai lik. Ù tiah bơh rlau 50 jơi bơtiàn ơm kis bal dê kung là tiah lơh sa suơn sre li la, bal mờ kơphe, sầu riêng, tiêu, ka kau lam lài gùt lơgar; kòi sre tàm do mìng ơn tơnơ̆ Tiah ring dà dờng Hồng mờ Tiah ring dà dờng Cửu Long. Bè hơ̆ den tàng Jơnau lơh nền tàm pơrjum mờ Quôk hội ai tơlik Broă lơh jơnau kờñ dà lơgar bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ tiah kơh bơnơm ngan là rơp gam ngai sơlơ lơh geh cồng nha rlau tai, kơp kơnờm lơh gơlik ală mpồl lơh gơlik phan bơh brê tus dà lềng.

Ồng Nguyễn Xuân An, Lam bồ Cơldŭ niam chài mpồl bơtiàn sàh Ea Na pà git, sàh geh wil tơl bơta li la bơh càr Dăk Lăk dê bơh kòi sre, chi tam jŏ nam tus ròng phan tàm dà mờ kung gam bơt bơtàu tai ală broă lơh lơh bal ală mpồl lơh gơlik phan nàng kờñ pơgồp bơnah lơh gơs bơta mờng chài, lơh pa broă lơh sa kă bro tàm ală ƀòn: “Bơdìh mờ ală mpồl lơh bal lơh gơlik kơphe den nam do sàh kung neh pờ tai ală mpồl lơh bal lơh gơlik kòi nàng dipal mờ ală ƀòn tam jơh bal kòi mờ kơphe. Mờ priă bơcri dà lơgar dê rơp dong làng bol jơh bal bè bơta chài măi mok, phơng soh mờ lơh sa pal jat broă rơndap lơh. Ală mpồl lơh sa kă bro dilah geh pràn jak mut tàm mpồl lơh gơlik phan den rơp cih mat dan. Tàm ală mpồl do, làng bol lơh broă sa rơp lơh broă jat di broă rơndap lơh den geh mpồl lơh sa kă bro blơi jơh phan lơh gơs mờ giă blơi jơnhua rlau mờ giă tàm drà kă bro”.

Dà lơgar dong kờl priă jền, dà lơgar bơto pơlam bơta chài măi mok, dà lơgar lơh bal mờ làng bol bal mờ mpồl lơh sa kă bro, hơ̆ là cồng nha bơh ală broă lơh lơh bal ală mpồl lơh gơlik phan dê, dùl bơnah dềt lơm mơya bềng bơta kuơ tàm broă lam lơh gùng dà broă lơh bơh Quôk hội dê bè bơtàu tơnguh lơh sa mpồl bơtiàn tiah làng bol jơi bơtiàn dồ êt nă cau mờ tiah kơh bơnơm. Gùng dà broă lơh geh ai tơlik geh tŭ tơngai hơ pơrgon, mơya lơh bal gam gơ gơs là bơnàng jă kơnhăp kơ̆ mờ lơh gơlik ală làng bol lơh broă sa tàm Tây Nguyên in bơta bơtàu tơnguh kơnhăp jŏ mờ hờm ram.