Lơh jăt “Broă lơh Quang Trung”, Ling tiah 5 neh hòi jà jơh bơta pràn, dong kờl lơh 610 nơm hìu pa mờ lơh niam wơl 314 nơm hìu gơtìp ờ niam tàm tiah ling dê. Mìng is tàm càr Dăk Lăk, geh 331 nơm hìu neh geh lơh pa, tàm hơ̆ 96 nơm hìu neh lơh gơs gờñ mờ jào tàm dơ̆ sơnrờp do.

Đơs tàm dơ̆ jào, Trung tướng Lê Ngọc Hải, Kwang đơng lam Ling tiah 5 pà git, lơh jăt “Broă lơh Quang Trung, cau ling neh tus mờ làng bol mhar ngan, lơh wơl hìu gờñ ngan, nàng làng bol geh hìu ơm, kơl jăp rài kis, wă rờ Satềp tơl, hờm ram rơlao. Ală hìu lơh pa ờ mìng là hìu ơm, mờ gam là anih kơl dìng nùs nhơm, pơn jăt tai nùs nhơm pin dờn nàng làng bol sơrlèt kal ke, bơ̆t bơtàu wơl rài kis tơnơ̆ mờ rềs àr bơh trồ tiah lơh aniai.

Tàm Khánh Hoà, dơ̆ jàu hìu dơ̆ do geh 6 hìu bơnhă gơwèt sơnah ƀòn Đô Vinh, sàh Phước Hậu mờ sàh Tây Khánh Sơn. Nàng ală hìu ơm do geh lơh sir di tŭ tơngai, gàr niam bơta kơnhăp kơ̆, Ƀộ Tư lệñ Ling tiah 5 neh sồr Gah đơng lam Ling klàng càr Khánh Hoà pơgồp bal niam mờ Tiah 4 Ling dà lềng, Lữ đoàn Ling đặc kông dà 5 mờ mpồl ling griăp ƀòn ală tiah dê, sơrlèt ală bơta trồ tiah tơngai, mìu nisơna, lam lơh sùm jơh gùt ngai mang, bal mờ ngai ơm rlô tơn.

Tàm hơ̆, Gah đơng lam Ling klàng càr Khánh Hoà, Tiah 4 Ling dà lềng mờ Lữ đoàn ling đặc kông dà 5 tơl mpồl ling să tờm tơn lơh 2 nơm hìu. Đơs tàm dơ̆ jàu hìu ơm, Thiếu tướng ồng Trần Thanh Hải, Phó Tư lệñ Ling tiah 5, đơs nền “Broă lơh Quang Trung” là cơng tàng loh làng ai nùs nhơm tàm dong tàm kờl bal, nùs nhơm niam bơnĕ bơh cau Việt Nam dê tàm ală tŭ kal ke, tơngŏ loh làng gùng dà broă lơh “Tiah lơi Làng bol gơtìp kal ke, tềng hơ̆ geh cau ling”.