Ală ngai do, tàm tiah lơh hìu pa thôn Phú Phong, sàh Hoà Thịnh, nùs nhơm lơh broă geh bơyai lơh gơ jal ngan bơh drim gờñ tus tàm trồ mang jơla. Tơl nă cau ling dà kơl hề sù jơh ào, tơryang tơryồng ơn tơl nai găc, bơrlŭ tơl dơ̆ sơmang, lơh ngan lơh hìu dong Làng bol in. Hạ sĩ Thái Tiến Tài, Tiểu đoàn 35, Lữ đoàn Đặk kông 198 pà gĭt, pah ngai sền ală nơm hìu rơ hời mờr lơh sir, oh mi tàm mpồl ling cau lơi kung chờ hờp ngan lơm:“Oh gơ lơh pơn yờ să ngan tài bơh geh tus bal broă lơh dong kờl làng bol tiah dà tih dà lìu tàm do in. Tŭ mù tàm do, sền rài kis làng bol kal ke ngan, ală hìu ơm tơrlah tơrlơm jơh bè do. Dŭt ndơl, sền cồng nha bè do, oh gơlơh chờ hờp ngan, pơn yờ să ngan”.

Gơwèt mờ làng bol thôn Phú Phong, sàh Hoà Thịnh, bơta geh mat bơh cau ling dê ală ngai do là tiah kơldìng nùs nhơm dờng màng ngan. Mò Nguyễn Thị Tám (80 sơnam), ngoh rơngăc tài bơh pa do lơm ñhah ñhờt tàm tiah gơn ru tơrlah, tŭ do neh rcang mut ơm tàm hìu pa:“Tŭ pa ngơr bam dà tih dà lìu, tus gŏ nđàc sơngĭt ngan gĭt lơh, ờ kơlôi broă lơh lơi mờ he geh tai hìu ơm bè hơ̆ ờ. Mờ tŭ do geh hìu ơm bè hơ̆ là niam ngan rao, hìu bơt niam mờ cau ling lơh mhar, jơh nùs jơh tồr, rơwah rùp hìu, dà sơng do kung niam ngan sơl. Tŭ do cau lơi tus còp kung prơ ngan lơm”.

Đơng lam tơn tàm tiah lơh broă, Thiếu tá ồng Nguyễn Văn Vượng, Tiểu đoàn 35, Lữ đoàn Đặk kông 198 pà gĭt, tiah mpồl ling drơng broă geh mìu jŏ jòng jơh nhai tơn. Tàm tŭ hơ̆, sơnah gùng mut wềt ngan, kal ke ngan jun pơndiang phan bơna. Geh ƀòn dềt ơm tàm nggùl ƀlàng sre ờ geh bơnàng hìu gùt dar, gùng lòt rê gơtìp tam cah jơh, mpồl ling pal mù tiă tàm bŏ, tui tơl ƀao sơmang, tơl nai gac nàng mut lơh. Mơya mờ nùs nhơm jơh nùs lơh ngan, ờ kờp ngai mang, sơr lèt gan kal ke bòl glar, kwang bàng, cau ling neh ngăc ngar rơndăp tŭ tơngai, gơ jal lơh tơl tŭ tơngai ƀuơn ngan nàng lơh mhar tŭ tơngai mut lơh:“Tàm tŭ lơh broă dong làng bol tàm do den bol añ lơh jat jơh nùs nhơm geh kơnòl, ờ kờp ngai mang, trồ tơngai halà trồ mìu, trồ tiah tàm do den trồ tơngai, trồ mìu kal ke ngan. Mờ nùs nhơm jơh nùs lơh ngan, kwang bàng, cau ling bol añ tam klăc bal, kờñ gơboh bal mờ gơ̆p, tàm tơngkah bal tàm tŭ lơh jat kơnòl broă mờ lơh sir niam ngan kơnòl broă tàm tơngai lơyah ngan”.

Tus tơngai tŭ do, broă “Broă lơh Quang Trung” lơh hìu ai làng bol tiah dà tih dà lìu càr Dăk Lăk in gam mut tàm tơngai dŭt ndơl. Mờ Lữ đoàn Đặk kông 198, neh geh 5 nơm hìu lơh sir. Ală hìu gam wơl rơ̆p geh tàm jàu tàm bàr pe ngai tus, lài mờ tŭ tơngai geh ai ngai 15/1/2026 mờ Thủ tướng Cíñ phủ dê jàu. Bal mờ hơ̆, nàng dong làng bol gờñ bè ờs wơl rài kis, mpồl ling neh rcang gơ lơh bè mờr tơl làm ală phan ngui tàm rài kis pah ngai kờñ pal geh bè: tivi, kƀàng, cơghĕ, jơnờng, glah chèng, mơngàn, jơlŭ, ồi tơ̆, kơmùng, phan ngui sa nàng pà tơl hìu bơnhă in tŭ mut ơm hìu pa. Thượng tá ồng Phạm Sỹ Cương, Phó Cíñ ủy Lữ đoàn Đặk kông 198 pà gĭt:“Bol añ pơnđơl pràn lơh ngan bơh sơn rờp là rơ̆p sơr lèt gan tŭ tơngai mut lơh, jơh ală hìu bol añ lơh den tus ngai 9/1 rơ̆p lơh sir, tàm jàu ai làng bol in. Bơh hơ̆, dong làng bol geh dùl tơngai sa tềp Bính Ngọ chờ hờp ngan mờ bơtòm tơrgùm”.

Sa tềp bơhiàn dà lơgar nam 2026 gam tus rềp ngan, thôn Phú Phong, sàh Hòa Thịnh, càr Dăk Lăk gam soh tàm să he dê dùl muh mat pa. Tàm bơnàng ù tơl bơta sơrlồng sơrloàng gơnru tơrlah tơnơ̆ dơ̆ dà tih dà lìu dờng tàm lồi nhai 11 nam 2025, ală hìu ơm kơnhăp kơ̆ dờng niam neh mờ gam lơh sir. Tàm hơ̆, geh tềl lời wơl uă ngan bơh ală cau ling đặk kông 198, gam lơh ngan tơl tŭ jiơ nàng Làng bol in gờñ bè ờs wơl rài kis.

Ală hìu ơm pa ờ mìng geh lơh mờ găc, lŭ, sơmang lơm, mờ gam geh lơh mờ dà kơl hề, bơta duh rơngòt kơrnoat boh lam mờ nùs nhơm tàm sơnđàc bal jrô ơnàng uă ngan bơh cau ling mờ làng bol dê. Broă Lữ đoàn Đặk kông 198 (Ƀiñ củng Đặk kông- Ƀộ Ling klàng) lơh ngan lơh sir gờñ “Broă lơh Quang Trung” dùl dơ̆ tai đơs nền nùs nhơm niam bơnĕ bơh Cau ling Wa Hồ dê- sùm geh mat tŭ làng bol kờñ, crăp rcang sơr lèt gan tơl bơta kal ke tài rài kis lơngăp lơngai bơh làng bol dê.