Càl rbut dờng sồ 13 mờ ngan là dơ̆ dà tih dà lìu dờng ngan ờ hềt geh bơh lài tus tŭ do tàm lồi nhai 11 pa do neh lơh 1 rbô 653 nơm hìu tàm tiah tàm gùl lơgar mờ Tây Nguyên gơtìp tơrlah tơrlơm jơh, rlau 35 rbô nơm hìu gơtìp ờ diơng, git nđờ jơt rbô hìu bơnhă làng bol gơ ơm tàm bơta kal ke ờ git lơh. Tơnơ̆ tŭ dà tih dà lìu dờng pa gơ hoài soat, bŏ, ù gam gơ bam tàm làm gùt tiah đah jum tàm gùl lơgar, Thủ tướng Cíñ phủ ồng Phạm Minh Chính neh tus mờ tiah tờm gơbàn dà tih dà lìu tàm tiah đah mat tơngai lik càr Dăk Lăk, geh jơnau hòi jà cíñ trị: lơh niam wơl mờ lơh pa wơl hìu ơm ai làng bol in tơnơ̆ git nđờ bơta jê sồt roh rui: “Bol he lam lơh “Broă lơh Quang Trung” cèng bơta sơrbac mhar, khin sơnơng, khin lơh tàm broă lơh hìu ơm. Broă lơh Quang Trung bơsong 2 broă gơ rềng tus hìu ơm. Dùl là lơyài ngan rlau jơh lài ngai 31/01/2026 jơh ală hìu gơtìp tơrlah tơrlơm, hìu gơtìp dà cò pơrdô pal lơh wơl jơh. Kơnòl dơ̆ 2 là lơh niam wơl hìu ơm gơtìp ờ diơng den pal lơh gơs lài mờ ngai 31/12/2025”.

Dùl ngai tơnơ̆ jơnau hòi jà lam lơh bơh Thủ tướng Cíñ phủ dê, ngai 01/12, bơh Hà Tĩnh tus Lâm Đồng, is ồn là tiah tờm càl rbut dờng, tiah tờm dà tih dà lìu ală càr Dăk Lăk, Khánh Hòa, Gia Lai, rlau 5 rbô 600 nă kwang bàng, cau ling bơh ală mpồl ling; mờr 5 rbô 100 nă kwang bàng, cau ling mpồl kwang àng neh dồ ròt ai cau lam lơh broă lơh.

Trồ mang bơh nhai mrềt dê gơ tus mhar ngan tàm tiah dà tih dà lìu Hòa Thịnh, càr Dăk Lăk. Tàm sap phan nrau trồ mang, tàm bơta bŏ gam lơm bè ngan, àng đèng sò bơh tiah lơh broă lơh gơ sòl huềng cau ling dê ià xô, tùng phan lơh hìu, khi sơn đờm dùl dơ̆ lơh broă krơi is: lơh wơl hìu làng bol in bơh ală bơtô bơnàng hìu tàm bŏ jrô. Ờ geh tềl sồr lơh, ờ geh jơnau đơs, “Broă lơh Quang Trung” sơrbac mhar mpờl gŏ mờ ală bơta pŏ ù pràn, ală xô bê tông tàm pơ dờn gơ jă gơ jal mờ ală cơnđuà jơng tàm bŏ lơh broă gùt mang.

Trung uý ồng Hồ Hoài Phin, Tiểu đoàn 1, Trung đoàn 143, Sư đoàn 315, Ling tiah 5 pà git, tàm bàr pe anih lơh bơnàng hìu, ală cau ling pal lơh wơl uă dơ̆ tài bơnàng ù pơn jat tai gơ mƀùr: “Bŏ lơm bè do gơ đềt ngan, gơ lơh gơkòl tus uă broă. Bulah kal ke ngan mơya mờ nùs nhơm geh kơnòl uă ngan rlau jơh, oh mi kung gam pơnđơl lơh gơs jơh khà broă, lơh geh bơta niam ngan rlau jơh”.

“Sơrbac mhar” là nùs nhơm geh đơs sùm tàm “Broă lơh Quang Trung”, mơya bơta duh rơngòt mờ bơta chài măi mok geh ơn ndrờm mờ jơnau sồr tŭ tơngai hơ pơrgon lơh hìu. Thượng tá ồng Đỗ Thành Thái, Cíñ uỷ Sư đoàn 315, Ling tiah 5 pà git, mìng geh dùl bơta nàng ală mpồl lơh broă lơh gơtùi jơh bal 2 jơnau sồr, hơ̆ là sơlơ pơnđơl, lơh broă gùt mang tơn: “Trồ tiah ờ niam, trồ mìu uă, mơya bol hi sùm đơs mờ kwang bàng, cau ling mờ nùs nhơm bơsong kal ke. Tam pà gơs 3 dơ̆ 4 dar, is ồn là sơlơ tơnguh tai mpồl lơh broă trồ mang nàng bol hi lơh gơs kơnòl broă”.

Nùs nhơm “Sơrlèt gan trồ tơngai, jai mờ trồ mìu, lơh gùt trồ mang jơngo”, kwang bàng, cau ling tus bal “Broă lơh Quang Trung” ờ ai gơnoar he lơyài. Bơh àng drơm gờñ tus tŭ trồ mang, ală cau ling ào đềt bŏ, kung gam tuh bê tông, geh cau den lơh jrong hìu. Đơng lam kung lơh bal, ală cau ling bal mờ gơp àñ ơnòng broă kơn jơ̆.

Gơ wèt mờ làng bol tiah dà tih dà lìu, broă geh sền tơn ală hìu he dê lơh rơhời lơh gơs tàm trồ mang ờ mìng là bơta chờ hờp, mờ gam là bơta pơn jờng nùs nhơm tơnơ̆ ală ngai roh rui. Ồng Lê Hùng Nhựt, thôn Mỹ Điền, sàh Hoà Thịnh, càr Dăk Lăk pà git: “Cíñ phủ ai ling tus dong làng bol bè do den bol he chờ hờp ngan, ưn ngài uă ngan. Dilah ờ geh mpồl ling dong kờl, ờ hềt đơs broă lơh hìu, mờ broă pơs wàs tiah ơm kis kung neh ờ git lơh bè lơi rau”.

Tơnơ̆ 3 poh lam lơh “Broă lơh Quang Trung”, ală hìu pa rơhời mpờl gŏ tàm bŏ dà tih dà lìu dê. Do ờ mìng là anih jơm tơngai, jơm dà mìu, nàng làng bol in đềt mềr mờ ƀòn lơgar tơnơ̆ trồ tiah lơh aniai. “Broă lơh Quang Trung” neh sơrlèt gan bơta ai tơlik bơh dùl broă lơh bơsong jơnau gơ lời wơl tơnơ̆ trồ tiah lơh aniai dê, gơ gơs là rùp pơrya niam ngan bè bơta pràn tam klac bal mờ kơnòl cíñ trị tềng đap làng bol. Jơnau sồr bơh cau lam bồ Cíñ phủ dê neh tơrbŏ mơ tơn mờ tŭ tơngai lam lơh sơrbac mhar bơh ală cau ling dê. Ală hìu tual tang ing jơm glòm làng bol rơhời geh tă jơh, lời wơl ală hìu pa, bè tềl gơ klŏ gơ crà bơh bồ tơngoh lơh ngan mờ nùs nhơm kòn bơnus dê. Ală tềl gơ klŏ gơ crà do gam geh bơt bơtàu mờ bồ tơngoh kơlôi sơnơng pa, gàr bơta kơ̆ kơnhăp mờ tŭ tơngai, dong làng bol ờdo ờdă rlau tàm ală bơta tam gơl bơh trồ tiah lơh aniai dê.