Nhai 02 nam 2023, Ling Sền gàr tiah nhàr lơgar càr Cao Bằng neh jòi kŭp geh jơnau lơh tìs CB223p bè broă lơh tăc blơi cau, cau gơtìp aniai là sau dềt ờ hềt di dồ nhai sơnam. Mpồl lơh broă geh gơnoar neh kŭp Lê Thị Mỹ Lệ mờ Phạm Thành Sinh (ndrờm ơm kis tàm kơnhoàl Krông Păch, càr Dăk Lăk). Ală cau gơtìp kŭp bàn tŭ gam lơh broă lơh lam sau dềt dô gan tiah nhàr lơgar gơ wèt ù tiah ƀòn Tềnh Quốc, xã Cần Nông, kơnhoàl Hà Quảng. Nhai 07 nam 2023, Kwang àng càr Cao Bằng pơn jăt tài jòi bàn mờ kŭp dơ̆ lơh tìs sồ 623M, dong 2 nă kơnòm ùr pa dờng là cau gơtìp aniai bơh cau lơh tìs tăc blơi cau bơh lơgar Myanmar rê hờ lơgar Việt Nam. Yal bè jơnau geh ngan tăc blơi cau neh geh tŭ gơlik geh tàm tiah do, bi Hứa Thị Thạch, Củ tịc Mpồl Tam klăc Cau ùr xã Cần Nông, ƀòn drà dềt Thông Nông, kơnhoàl Hà Quảng, càr Cao Bằng, yal: Xã Cần Nông là xã tiah nhàr lơgar. Bè jơnau geh ngan tăc blơi cau gan tiah nhàr lơgar den kung gam gơlik geh sơl tàm xã do, is ồn là tàm ală nam pa do kung neh gơlik geh sơl 1, 2 dơ̆ tàm xã. Dồ dơ̆ pa ngan rlau jơh là tàm nhai 2 nam 2023 là dồ dơ̆ oh klau dềt pa deh di 16 ngai lơm neh gơtìp bol tăc blơi cau sền mờ geh jơnau kờñ jun oh tus lơgar Lo mơya neh gơtìp mpồl lơh broă geh gơnoar gŏ tàm jrong sồ 614 xã Cần Nông. Tơnơ̆ tŭ ală gah lơh broă geh gơnoar gŏ mờ kŭp den să tờm añ là Củ tịc Mpồl Cau ùr xã tơnơ̆ tŭ gĭt jơnau do kung là neh să tờm tơn lòt tus sền gàr oh dềt tàm pôs ling sền gàr tiah nhàr lơgar mờ hòi jà kwang bàng tiah do, ală hìu bơnhă geh sau dềt dong tă bal mpha blờt, biài dă mờ dong kờl dà toh tơnơ̆ hơ̆ hòi jà tă pơgồp priă jền tơmŭt tàm kes priă dong kờl pơn jờng bơsram bơh kơnhoàl dê kung pà geh 2 tơlak đong nàng blơi dà toh ai oh dềt in, tơnơ̆ hơ̆ añ lam oh dềt lòt jàu ai Anih tờm Sền gàr dong kờl mpồl bơtiàn càr in nàng pơn jăt tai sền gàr mờ ròng siam oh.

Nàng kơryan lài cau lơh tìs sơbơng roh do, bal mờ bơta tus bal tam dră kràñ cê jơh nùs bơh mpồl lơh broă geh gơnoar dê bè Kwang àng, Ling Sền gàr tiah nhàr lơgar, tàm dơ̆ lơh jăt ală tơnggume Rơndăp broă 08 “Lơh jăt ring bal ùr klau mờ bơsong ală broă jal mhar gơ wèt mờ cau ùr mờ kơnòm dềt”, Mpồl Tam klăc Cau ùr càr Cao Bằng neh geh uă broă lơh tơrlòng lài mblàng yal jơnau bơceh lơh, mờ geh cồng nha. Bi Hứa Thị Thạch, Củ tịc Mpồl Tam klăc Cau ùr xã Cần Nông, pà gĭt tai: Tàm bơta gĭt wă bơh làng bol tiah do dê, den bơta tăc blơi oh kòn nàng lòt tus đah ne tiah nhàr lơgar nàng lơh apah nàng bau mờ klau lơgar ndai…den gơ kung là pơhìn ngan mơkung gam gơlik geh sơl. Bol hi mblàng yal tàm ƀòn lơgar den sùm mblàng yal tus làng bol ƀòn lơgar in, tus cau geh pơhìn tăc cau den bol hi mblàng đơs loh bè ală broă lơh tìs ờ di tŭ lơh broă lơh tăc blơi cau mơkung yờ tơngguh uă bơta gĭt wă tai mờ là bơta kơnòl bơh mpồl bơtiàn dê tàm broă yal yă ală cau lơh tìs tŭ mờ he là làng bol tiah nhàr lơgar mờ he gŏ ală cau krơi mờ gŏ jơnau bè hơ̆ den pal yal mờ tơn mờ gơnoar ătbồ tiah he dê in halà mpồl lơh broă geh gơnoar nàng bơsong di tŭ.

Jăt bi Hoàng Trang Định, Củ tịc Mpồl Tam klăc Cau ùr ƀòn drà dềt Thông Nông, kơnhoàl Hà Quảng yal, bal mờ gơnoar broă là cau mblàng yal, hòi jà mờ dong kờl cau ùr, kơnòm dềt gơtìp tăc blơi rê mờ mpồl bơtiàn, tơl nă cau ùr tàm mpồl là dồ nă cau mblàng yal jơnau tàm ƀòn lơgar. Bơta do rơ̆p dong cau lơh broă lơh mblàng yal hòi jà tàm ƀòn lơgar rề ơnàng mblàng yal tus mpồl cau ùr kờñ dong kờl. Bi Hoàng Trang Định, đơs: Bè broă lơh blàng yal rơcăng lài kơryan tăc blơi cau den tàm tơngai lài kung geh kâp ủy đảng, gơnoar ătbồ sền gròi ngan. Tàm ală nam lài den kung geh sơl dồ nă cau ùr tàm mpồl gơtìp tăc tus lơgar Lo. Tơnơ̆ tŭ rê wơl hờ ƀòn lơgar, bơyô cau ùr tàm mpồl do kung gơlơh ƀàs sìl sơl, tơnơ̆ do geh ală gah mpồl cau kung bè ală kâp mpồl sền gròi ai tơl bơta mờ rơcăng lài lùp nàng gĭt bơta kơ̆p kờñ jơnau kơlôi sơnơng, tơm bơh bơr di gùng mờ geh ală jơnau pơndờm pơnđiang den bi hơ̆ sang tĕ đau geh bơta ƀàs sìl bơh să tờm dê mờ rơhời mŭt gơrờm bal tàm mpồl bơtiàn mờ bi hơ̆ kung neh khin cha rlau, rơcăng lài tus bal ală mpồl tàm ƀòn lơgar.

Tơngai do, Mpồl Tam klăc Cau ùr càr Cao Bằng sền broă mblàng yal rơcăng lài kơryan tăc blơi cau là dùl tàm ală tơngume tờm ngan tàm lơh jăt ring bal ùr klau mờ bơsong ală broă jal mhar gơrềng tus cau ùr mờ kơnòm dềt tàm càr. Jăt mò Nông Thị Tuyết, Củ tịc Mpồl Tam klăc Cau ùr càr Cao Bằng yal, nàng lơh jăt gơtùi ală tơngume bơh Rơndăp broă 8 dê, is ồn là mblàng yal jơnau rơcăng lài kơryan tăc blơi cau gơ sồr broă lơh mờ lam lơh pa wèt tus jơnau kờñ tơngguh jơnhoa cồng nhan ngan ngồn broă lơh rơcăng lài kơryan tăc blơi cau ùr, kơnòm dềt; yờ tơngguh bơta gĭt wă tàm cau ùr tàm mpồl mờ cau ùr nàng kờñ sang jơh jơnau tam cah ờ rờm bal ùr klau, lơh pờng tàm hìu bơnhă, tăc blơi cau ùr, kơnòm dềt.

Kung jăt Củ tịc Mpồl tam klăc cau ùr càr Cao Bằng dê yal, tơngai do, Mpồl neh sồr ală mpồl mblàng yal jơnau pal đơs sùm mblàng yal bè jơnau pơhìn, kai, jơnau gơlời wơl bơh tăc blơi cau; jơnau cih bơh adăt boh lam dê bè bơsong broă lơh tìs tăc blơi cau mờ broă bơsong jơnau digơlan gơlik geh tŭ gŏ dơ̆ broă tăc blơi cau ùr, kơnòm dềt digơlan gơlik geh tàm mùl màl; bàr pe broă dong kờl mờ drơng broă bơh mpồl cau ùr ală kâp dê tàm dong kờl, sền gàr cau gơtìp tăc blơi rê wơl…

Ală broă lơh tơrlòng lài mblàng yal jơnau tàm càr Cao Bằng pà gŏ bơta tam gơl, bơceh lơh bơh ală kâp mpồl, gơnoar broă, kơnòl broă bơh kwang bàng, cau ùr tàm mpồl, mblàng yal jơnau mpồl bơtiàn dê tàm broă rơcăng lài kơryan tăc blơi cau, tàm sơm băt tê bal bơ̆t bơtàu tiah ơm kis lơngăp lơngai ai cau ùr mờ kơnòm ùr in.