Càr Dăk Lăk tŭ do geh di pơgăp 450 rơbô nă cau dờng sơnam, geh 13,5% khà kờp làng bol. Broă dong kờl geh ai nàng dong kờl mpồl cau bơh 60 sơnam tus hờ đơm 75 sơnam geh rài kis gơtìp kal ke, ờ hềt geh dờp broă dong kờl Sră sền gàr să jan ndai, mờ pơgồp bal tàm broă tơnguh bơta geh Sră kham sơm kòp ờ sa priă càr dê.

Ồng Trần Mạnh Toàn, Kwang Lam bồ Sền gàr mpồl bơtiàn càr Dăk Lăk đơs là, bơta kwơ màng là Jơnau lơh nền tàm pơrjum pa rơ̆p bơtơl bơta pràn rài kis mpồl bơtiàn gơwèt mờ cau dờng sơnam in: “Broă lam sồr cau dờng sơnam tàm càr Dăk Lăk tă is priă blơi Sră kham sơm kòp ờ sa priă den kal ke ngan. Ală cau bơh 60 tus 75 sơnam mờ ờ hềt dờp broă dong kờl lơi bè sền gàr să jan là bơta gơlời ờ tơol uă ngan bè bơta pràn rài kis mpồl bơtiàn. Jơnau lơh nền tàm pơrjum do rơ̆p gàr geh bơta tơl sră kham sơm kòp ờ sa priă ai cau dờng sơnam in”.

Bè priă jền, càr Dăk Lăk neh rơcang lài 38 tơmàn đong nàng lơh jăt broă dong kờl do tàm 4 nhai lồi nam 2026. Bơh nam 2027, khà priă do kờp dŭ geh kờp tàm bơta lơh ndrờm bal kes priă sàh, sơnah ƀòn dê. Ală gah lơh broă, ală sàh, sơnah ƀòn tàm càr geh sồr pal sùm tơrgùm jơnau yal nàng git di cau geh dờp, pleh mờ bơta gơtìp ndrờm bal mờ ală broă dong kờl ndai.

Ồng Lương Nguyễn Minh Triết, Bí thư Tỉnh ủy càr Dăk Lăk đơs nền, bŭ lah càr gam kal ke, broă ai geh priă nàng drơng tàm broă dong kờl rài kis mpồl bơtiàn kung gam pal geh ai lài: “Tàm bơta kal ke ngan càr dê, mơya kung pal ai geh priă uă nàng dong kờl rài kis mpồl bơtiàn in. Jào Anih duh broă Làng bol càr lam broă lơh do mờ jào ală Mpồl lơh broă tàm Mpồl duh broă Làng bol càr dê sền wơl jơh nàng ring bal tàm pơrjum Mpồl duh broă Làng bol mờr tus do”.