Nam bơsram pa 2026 – 2027, gah bơto bơtê mờ bơsram càr Lâm Đồng digơlan ai tơmŭt ngui 250 cơldŭ bơsram, tàm hơ̆ geh 200 cơldŭ bơsram ƀộ môn mờ 50 hìu ngui uă broă. Bal mờ hơ̆ là ală broă bơ̆t bơtàu dong kờl ndai, ƀlàng nhơl, ƀlàng tàp mờ tiah drơng ơm kis pah ngai, pơgồp bơnah rơhời lơh sir ală hìu bơsram cơldŭ bơsram, lơh geh jơnau kờñ bơsram bơh kơnòm bơsram dê.

Bal mờ bơcri phan bơna mờ măy mŏk phan ngui, broă gàr tơl sră bơsram ai kơnòm bơsram in ngan là kơnòm bơsram tàm tiah kal ke kung geh gĭt nền là kơnòl broă tờm kwơmàng lài mờ nam bơsram pa. Tềng đăp măt, Sờh Bơto bơtê mờ Bơsram càr Lâm Đồng neh dan ai rlau 49 tơmàn 700 tơlak đong nàng blơi sră bơsram dơ̆ I ai kơnòm bơsram tàm ală hìu bơsram bal jơi bơtiàn ơm sa bĭc tơn, ơm sa ngai; kơnòm bơsram tàm 5 sàh nhàr lơgar, Tiah is ồn Phú Qúy mờ ală sàh kal ke ir.

Tàm ală anih bơto bơtê, broă bơtàu tơngguh tùh sră ngui bal, hìu sền sră bơsram, hòi jà srơh pà mờ tàm pơgơl sră đah ală khoă bơsram pơn jăt tai geh lơh pràn. Ală hìu bơsram ai lài dong kờl kơnòm bơsram jơi bơtiàn dồ êt nă cau, kơnòm bơsram gơ wèt hìu rƀah, pa jơh rƀah, kơnòm bơsram kwĕt kơlte, kòn đời, bơh hơ̆ pơgồp bơnah gàr jơh ală kơnòm bơsram ndrờm geh tơl sră bơsram nàng bơsram sră, ờ lời kal ke bè lơh sa gơgơs bơta gơ kơryan tus klờng. Ồng Nguyễn Văn Quang, Phó Chủ tịch Anih duh broă Làng bol sàh Đam Rông 4, càr Lâm Đồng pà gĭt, broă lơh rơcăng nam bơsram pa bơh sàh dê neh lơh sir jơh, crăp rơcăng wă rlau 4 rbô 300 nă kơnòm bơsram lòt bơsram.

 “Phan bơna hìu bơsram cơldŭ bơsram mờ klàr is, ờdiơng tai bol hi neh ai priă jền ai lơh niam wơl. Ală măy mŏk phan ngui bơto, phan ngui bơsram mờ ờ tơl den bol hi neh kờp sền wơl mờ ai blơi. Tus tŭ do sền bal là kơƀàng, cơghế, hìu bơsram cơldŭ bơsram, mờ geh bal sră măy hơ̆ là sră bơsram ală hìu bơsram bơh Đam Rông 4 dê neh crăp rơcăng. Broă lơh rwah kơnòm bơsram gàr niam 100% ală sau tàm sơnam lòt bơsram ndrờm geh lòt bơsram. Bol hi kung lơh ngan sền gròi niam ngan rlau jơh gơ wèt mờ ală sau là kơnòm bơsram gơ wèt hìu rƀah, hìu kal ke mờ làng bol jơi bơtiàn dồ êt nă cau”.