Jơnau rcang cih Adat Ù tiah tam gơl geh Chính phủ sồr đơs mờ 7 mpồl broă lơh, tàm hơ̆ pal sền gròi ngan là broă lơh priă jền ù tiah mờ giă ù. Jat hơ̆, giă ù bơh Dà lơgar dê lơh nền jat tàm bơta jơnau kờñ, tơngai ngui ù, jơnau yal bơh sơn rờp mờ ală jơnau cih adat boh lam geh gơrềng dê.

Bal mờ hơ̆, ală jơnau yal bè ù tiah rơ̆p geh tàm tơrbŏ bal, tam pà bal mờ ală jơnau yal bơh ală gah, gah broă dê. Broă do geh kơ̆p gơn pơgồp bơnah gròi sền drà kă bro, tơrmù ƀà broă lơh tìs giă ngan ngồn, lơh geh giă ờ ngan, mơkung gàr niam tam pà di pal bơta tàm gơlin tai bơh ù dê. Chính phủ kung sồr đơs jơnau cih ngan ngồn bè giă ù mờ khà gơguh halà gơmù giă ù, lơh bơnàng jă kờp ală bơnah tă dia bơh ù dê; sền gĭt bơta kwơ ngui ù tŭ tam gơl mpồl lơh sa kă bro dà lơgar mờ kờp priă tơm tŭ dà lơgar ai ù.