Hìu bơnhă ồng Điểu Thắng, kòn cau M’nông, ơm tàm thôn Tân Bình, xã Dăk Ngo, kơnhoàl Tuy Đức, càr Dăk Nông geh 5 nă cau mơya mìng geh dùl nă ồng là cau lơh broă tờm. Pơ ùr gơtìp kòp gơ drồl mhàm tơngoh, ai kòn klau dờng gơtìp rềs àr, tŭ do ờ gơtùi lơh broă ờ. Ồng Điểu Thắng gam 2 nă kòn ùr nam do 15 mờ 16 sơnam, bơsram ơdŭ 9 Hìu bơsram kấp bàr mờ kấp pe Lê Hữu Trác, xã Dăk Ngo.

Bồ nam bơsram pa, klau pơgru atbồ ơdŭ neh tus tàm hìu tơn nàng hòi jà ală sau lòt bơsram mờ yal ală priă dong kờl geh ngan bơh Dà lơgar dê. Ồng Điểu Thắng pà gĭt, ală nam do kơnờm geh ală broă dong kờl bơh Đảng, Dà lơgar dê lời ai kơnòm bơsram kal ke in, 2 nă kòn ùr ồng dê geh ală bơta nàng lòt bơsram, ờ pal rlô bơsram. Ồng Điểu Thắng đơs:“Hìu bơnhă añ kal ke ngan, mờ ngài ngan mờ hìu bơsram, kung kơnờm geh bơta sền gròi bơh Đảng, Dà lơgar, hìu bơsram dong kờl ai ală sau in priă sa, priă ơm, priă lòt rê. Añ kung pơnđơl pràn lơh ngan sơl pơndờm pơnđiang ală kòn lơh ngan lòt bơsram nàng gĭt akhar, gĭt kờp sền nàng rài kis tơnơ̆ dơ̆ ờ hoan bòl glar đau”.