Anih duh broă Làng bol càr Gia Lai tơlik sră nggal nàng lơh jăt jơnau sồr bơh Cíñ phủ bè tơn jơh hìu sèt, hìu ñhăt dà, gàr niam làng bol in geh hìu ơm lơngăp lơngai mờ kơl jăp. Càr ai jơnau kờñ tơn jơh rơlao 3 rơbô nơm hìu sèt, hìu ñhăt dà bơh ală cau geh màng mờ dà lơgar, hìu rơƀah mờ hìu pa lik klàs rơƀah. Jơnau kờñ lơh gơs lài mờ nhai 9 nam 2025.

Jăt Sở Lơh broă-Cau ling sồt să mờ mpồl bơtiàn càr Gia Lai yal, bơh nam 2021 tus tŭ do, càr neh dong kờl lơh pa mờ lơh niam wơl 4 rơbô 365 nơm hìu mờ kờp jơh priă rơlao 234 tơmàn đong. Mơya cồng nha sền wơl pa ngan pà gŏ, càr gam rơlao 3 rơbô hìu rơƀah, hìu pa lik klàs rơƀah mờ cau geh màng mờ dà lơgar kờñ geh dong kờl lơh pa ha là lơh niam wơl hìu. Nàng lơh mhar broă lơh do, Anih duh broă Làng bol càr Gia Lai neh jào Sở Lơh broă-Cau ling sồt să mờ Mpồl bơtiàn đơng lam pơgồp bal mờ ală sở, gah lơh broă gơrềng bal lơh broă rơndăp lơh nền nòn, gàr di niam cau mờ pleh mờ broă gơtìp ndrờm bal đah ală broă lơh. Mờ Sở Bơ̆t bơtàu geh kơnòl lơh 3 bơta hìu di pal mờ bơhiàn tàm ƀòn lơgar dê, di pal mờ ală bơta niam chài mờ gàr tơl priă lơh di pal nàng làng bol ƀuơn rơwah lơh.