Tàm dơ̆ lik lơh broă uă bơh ngai 23 tus ngai 26 nhai 7, Kwang àng càr Lâm Đồng bơyai lơh dờp 1 rơbô 521 mẫn phan ADN bơh cau pròc mhàm cau chơ̆t màng jăt jơi đah mè. Broă ai mẫu geh lơh dơ̆ lĕ bal tàm 16 anih tơrgùm tàm càr mờ 3 mpồl lơh broă ntrờn tus tàm hìu ală Mè Việt Nam Khin cha jăk chài, cau pròc mhàm cau chơ̆t màng dờng sơnam, să jan ờ sô ha là ờ gơtùi lòt rê.

Geh măt bơh àng drim gờñ nàng ai mẫu, mò Phùng Thị Huệ, cau pròc mhàm cau chơ̆t màng Nguyễn Văn Thái, tơlik nùs nhơm kơ̆p kờñ gờñ git đal măt cau pròc mhàm nàng hìu nhă bal mờ oh kòn, kòn sao geh lơh anih chu ñàng kah kơlôi. “Kơ̆p kờñ dờng màng ngan bơh hìu nhă dê là đal git di măt ồng. Tŭ do bơtô ƀồc neh cèng rê tàm ƀlàng tơ̆p ƀồc mơya ờ hềt đal măt. Bol añ mìng kơ̆p kờñ tŭ oh kòn, kòn sao tus chu ñàng den git di bơtô ƀồc, di cau nàng kah kơlôi”.

Broă tă mờ dờp mẫu ADN ờ mìng nàng drơng tàm broă bơ̆t bơtàu tơngu me jơnau tơngit nàng đal git măt cau chơ̆t màng mờ gam ai tơngŏ kơnòl, nùs nhơm git ưn ngài gơwèt mờ ală cau neh phi să tài bơta krơi is, khăt gơboh Dà lơgar in. Thượng tá ồng Võ Xuân Bình, Phó Kwang lam bồ cơl dŭ lơh broă Cảnh sát atbồ sră nggal bè bơta niam lơngăp lơngai mpồl bơtiàn gơwèt Kwang àng càr Lâm Đồng pà git, mpồl kwang àng neh hòi jà uă ngan cau lơh broă, phan lơh broă nàng ai tơl bơta ƀuơn ngan ală cau pròc mhàm cau chơ̆t màng in tus bal ai mẫu. “Kwang àng càr neh lơh geh 16 anih tă mờ dờp mẫu ADN tàm gùt càr mờ 3 mpồl ntrờn tus tơl hìu ală cau Mè Việt Nam Khin cha jăk chài, cau pròc mhàm cau chơ̆t màng neh kra să ờ sô, broă lòt rê gơtìp kal ke. Bol añ lơh ngan lơh gơs kơnòl di mờ tơngai neh geh ai, gàr di bơta niam mờ lơngăp lơngai jơnau tơngit”.

Tơl mẫu ADN geh bơtơl rơ̆p pờ geh tai dơ̆ niam nàng đal git măt dùl nă cau chơ̆t màng ờ hềt git loh jơnau tơngit, pơgồp bal tàm broă lơh geh cồng nha Rơndăp broă bơ̆t bơtàu anih prăp gàr gen cau chơ̆t màng mờ di pal mờ jơnau kơ̆p gơn bơh uă hìu nhă dê tơnơ̆ git nđờ jơ̆t nam kơ̆p gơn cau pròc mhàm geh rê mờ ƀòn lơgar, măt sơnđan bơh să tờm dê.